165. Super Salve regina.

1. Salve, splendor praecipue
Supernae claritatis,

Regina vincens strenue
Scelus impietatis,

Misericordias tuae
Munus impende gratis.

2. Vita perennis caelica
Per te nobis donatur,
Dulcedo tua mellica

Maerentes consolatur,
Et spes nostra es unica,
Qua reus reparatur.

3. Salve, salvatrix omnium,
Languentum medicina,
Ad te, Dei triclinium,
Carens peccati spina,
Clamamus, fer auxilium,
Nos serves a ruina.

4. Exsules nos ad patriam
Reducas, ut fruamur,

Filii irae gratiam

Per te nunc consequamur,

Evae matris nequitiam,
Fac, ne experiamur.

5. Ad te sacratam virginem,
Insignem matrem Dei,

Suspiramus, ut turbinem
Tollas saevitiei,

Gementes duc ad cardinem
Caelestis requiei.

6. Et flentes in hac misera

Vita calamitatis
Lacrimarum post aspera

Lamenta gravitatis
Valle de hac nos libera

Et aggrega beatis.

7. Eia ergo conclusio

Mortis nostrae finalis,

Advocata, praesidio
Fac, ne sit gehennalis,

Nostra tunc fiat mansio
Cum Christo aeternalis.

8. Illos, quos gestas, porrige
Nobis sanctos profectus,
Tuos super nos erige
Benevolos aspectus,
Misericordes dirige
Ad nos semper affectus.

9. Oculos tuos placidos,
Sole splendidiores,

Ad nos, qui culpae sordidos
Amplectimur horrores,

Converte, ut et nididos
Servemus mentis mores.

10. Et cernere feliciter

Fac nos illum decorum

Iesum, quem chorus iugiter
Adorat angelorum,

Benedictum perenniter
Cum laudibus sanctorum.

11. Fructum, cuius fruitio
Praehet satietatem,

Ventris profers ex gremio
Servans virginitatem,

Tui fructus perceptio
Det plenam sanitatem.

12. Nobis posthoc lubricum,
Fallax, perniciosum

Exsilium, maleficum,
Nequam, laboriosum,

Ostende tuum unicum
Natum deliciosum.

13. O clemens et propitia,
Fel solve vitiorum,
O pia, pelle proelia
Hostilium malorum,
O dulcis, duc ad dulcia
Nos carmina caelorum.

14. Maria, nos mundifica
In sordibus iacentes,

Maria, nos sanctifica
Ad te confugientes,

Maria, beatifica

Nos in te confidentes.