151. Super Ave Maria.

1. Ave, virgo virginum,

Spes desperatorum,
Rosa, flos et lilium,

Decus angelorum,
Tuum placa filium,

Principem caelorum,
Ut sit memor omnium

Pauperum suorum.

2. Maria, mater gratiae,

Mater filialis,
Verus sol iustitiae

Lucis aeternalis,
Larga vena veniae,

Pudor virginalis,
Obstrue miseriae

Poenas gehennalis.

3. Gratia te providam

Angelo testante
Fecit atque fulgidam

Domino praestante
Virginemque floridam

Spiritu rorante,
Dei matrem candidam

Ipso adiuvante.

4. Plena es dulcedinis,

Virgo gloriosa,
Mirae pulchritudinis,

Tota luminosa,
Laudes huius carminis

Suscipe, formosa,
Terge culpas criminis,

Ne sit mens rugosa.

5. Dominus te condidit
Sibi genetricem,
Nobis vero edidit
Piam adiutricem,

Per te regnum reddidit
Pascidam nutricem,

Quod olim Adam perdidit
Per Evam seductricem.

6. Tecum Dei filius,

Sanctae trinitatis
Septiformis spiritus

Plenae sanctitatis,
Te implevit Dominus

Summae castitatis
Intus et exterius

Flamma caritatis.

7. Benedicta domina,

Mater Iesu Christi,
Te collaudant agmina,

Quia meruisti
Ferre solis lumina

Et non defecisti,
Lavantem mundi crimina

Tibi subiecisti.

8. Tu in mulieribus

Sancta creatura,
Carior virginibus,

Nobilis factura,
Dei facta manibus

Speciali cura,
Nobis peccatoribus

Veniam procura.

9. Et benedictus nuntius,

Qui te salutavit,
Eo nil ardentius,

Qui te obumbravit,
Nihil verbo dulcius,

Quod te fecundavit,
Ipso nihil sanctius,

Qui te consecravit.

10. Fructus tuus habilem

Suum det amorem,
Ut non exstinguibilem

Tribuat fervorem
Nobis et illabilem

Augeat ardorem
Et immarcessibilem

Conferat decorem.
11. Ventris obumbracula

Virginis intravit
Deus sine macula,

Haec beatificavit,

Contra hostis iacula

Ibi se armavit,
Mortis bibens pocula,

Quibus mundum lavit.
12. Tui ergo famuli,

Dulcis et benigna,
Sumus atque servuli,

Mater valde digna,
Iram placa parvuli,

Quia non privigna,
Fraude ne diabuli

Gaudeant maligna.