133. Super Ave Maria.

1. Ave, thronus Salomonis,
Ave, victrix Pharaonis,
Maria, fons pietatis,
Maria, vas puritatis.

2. Gratia te praeparavit,
Gratia te sublimavit,
Plena summis gaudiis,
Plena divinis gratiis.

3. Dominus te desponsavit,
Dominus te coronavit,
Tecum fuit, es nunc secum,
Tecum fuit, fac, sit mecum.

4. Benedicta mater Dei,
Benedicta tutrix rei,
Tu caelestis es regina,
Tu miseris medicina.

5. In te Deus se armavit,
In te mortem vita stravit,
Mulieribus praelata,
Mulieribus es grata.

6. Et hinc nobis remedium
Et confer vitae spatium,
Benedictus per te mundus,
Benedictus et fecundus.

7. Fructus tuus est amoenus,
Fructus tuus laude plenus,
Ventris gaudet humilitas,
Ventris placet virginitas.

8. Tui sumus, nos defende,
Tui sumus, tuis intende,
Amen, amen, repetamus,
Amen, ut te videamus.