114. Super Ave Maria.

1. Ave, nostrae spes salutis
Et humanae servitutis

Renovans opprobrium,
Maria, spe destitutis
Vitae munus et virtutis
Confer beneficium.

2. Gratia tu singularis,
Stella maris, lux solaris,

Dei paris filium,
Plena fluis, immo pluis,
Unde tuis pie luis

Peccati contagium.

3. Dominus, qui cuncta regit,
Trinitatis te elegit

Aulam et triclinium,
Tecum manens hostes fregit
Infernales et subegit

Per carnis commercium.

4. Benedicta, quae praecellis
In matronis et puellis
Tenens privilegium,

Tu fons roris, stilla mellis,
Tota dulcis, nullum fellis
Habens seminarium.

5. In te nihil indecori,
Gloriantur in te chori

Supernorum civium,
Mulieribus honori
Tuus fructus et amori

Nationi gentium.

6. Et quis tuae puritatis
Prosequatur digne satis,

O virgo, praeconium?
Benedictus, qui te gratis
Nobis dedit, ut peccatis

Adferres remedium.

7. Fructus pulcher ex colore,
Fructus dulcis ex sapore

Refectivus cordium,
Ventris tui natus flore,
Sed complutus caeli rore
Contra fructum noxium.