16. Horae de Passione Domini.

Introductio.

1. Recolamus sedulo,

Qualiter immundum
Rex aeternae gloriae

Reparavit mundum,
Passionis iugiter

Eius recordemur,
Ut in regno pariter

secum collaetemur.

2. Dominorum dominus,

Potens rex caelorum,
Christus, Dei filius,

Vita beatorum,
Qualiter sit venditus

Modico argento,
Nunc, homo, medullitus

Iugiter memento.

Ad Matutinum.

3. Matutino tempore

Deus angelorum
Traditur per osculum

Turmis Iudaeorum,
A cunctis deseritur

Salus peccatorum,
Annae primo sistitur

Iudex saeculorum.

4. Ducunt hunc ad Caipham

Manibus ligatum,
Collum eius feriunt,

Facie velatum
Et illusum conspuunt,

Probris saturatum,
Sic Messiam respuunt

Illis destinatum.

Ad Primam.

5. Hora prima pertrahunt
Iesum ad Pilatum,
Multis testimoniis
Falsis accusatum,

Seductorem asserunt
Lege condemnatum,

Alapis percutiunt

Christum, Dei natum.

Ad Tertiam.

6. Iesus hora tertia
Mori postulatur,
Tolle, tolle dicitur,
Tolle clamitatur,

Ad columnam nectitur,
Dire flagellatur,

Clamyde induitur,
Spinis coronatur.

Ad Sextam.

7. Hora sexta Dominus
Iesus iudicatur,
Ad mortem impellitur,
Cruce oneratur,

Nudus crucifigitur,
Malis sociatur,

Sitiens absinthio
Felleque potatur.

Ad Nonam.

8. Hora nona Dominus

Cuncta consummavit,
Iohanni discipulo

Matrem commendavit,
Heli, Heli clamitans

Spiritum efflavit,
Lancea transfigitur,

Solem tenebravit.

9. Mortem Dei filii

Cuncta recognoscunt,
Iudaeorum proceres

Soli non cognoscunt,
Sed eorum facinus

Petrae perhorrescunt,
Elementa omnia

Christo condolescunt.

Ad Vesperas,

10. De cruce deponitur

Hora vesperarum
A Ioseph senatore

Corpus Christi caram,
Mater hinc maestissima

Vulnera plagarum
Osculando abluit

Fonte lacrimarum.

11. Tali morte Dominus

Mundum reparavit,
Patri nos sic filius

Reconciliavit,
Crucis suae baculo

Zabulum prostravit,
Paradisi ianuam

Nobis reseravit.

Ad Completorium.

12. Hora completorii

Corpus plaga quina
Transfossum inungitur,

Vitae medicina,
Monumento tegitur

Vera lux divina,
Ut salvaret homines

Mortis a ruina.

13. Iesu nunc dulcissime,

Da, ut omnes gentes
Mortem amarissimam

Tuam recensentes
Cordeque promptissimo

Tibi condolentes
In caelorum culmine

Tecum sint gaudentes.