160. Super Magnificat.

1. Ave, cuius anima

mente cum devota
Dominum magnificat,

mea in te tota
Semper spes reposita,

domina, non sine,
Ut frustrari debeat

praeoptato fine.

2. Ave, cuius spiritus

in Deo salutari
Exsultat in iubilo,

mundi ne in mari
Patior naufragium,

quaeso, me in prora
Ad portum salutis duc,

virginum decora.

3. Ave, quam sanctificat
ob humilitatem
Omnis generatio,

meam pravitatem
Aufer a me, domina,
mundans a veterna
Labe, ne finaliter
mergar ad inferna.

4. Ave, cuius filius

potens magna fecit,
Qui me saepe corpore

menteque refecit,
Eundem tuum filium

tu pro me exora
Et culparum omnium

veniam implora.

5. Ave, o misericors

filiique mater
Misericordissimi,

qui et meus frater
Caritate factus est

ex te incarnatus,
Pro quo beneficio

semper ero gratus.

6. Ave, Dei filii

mater praeelecta,
Ut non cadam, domina,

me in via recta
Ducat tuus filius,

qui dispersit reos
Per terrae circuitum

superbos Iudaeos.

7. Ave, cuius filius

exaltat gentiles,
Quos Iudaei pessimi

reputabant viles,
Fac, ne me cum israel

deponat de sede ,
Sed ut regni superi

collocet in aede.

8. Ave, cuius filius

gentibus dat panes
Et Iudaeos divites

dimittit inanes,
Panem ipsum caelicum

semper esurire
Fontem aquae vivaeque

tu me fac sentire.

9. Ave, cuius filius

carnem puerilem
Suscepit ex Israel,

super me ne vilem
Ob peccata plurima,

age, dedignetur,
Sed misericordiae

suae recordetur.

10. Ave, cuius filius

patribus promissus,
Abraham et semini

eius fuit missus,
In cuius patris semine,

ut Genesis dicit,
Omnes gentes utique

Deus benedicit.

11. Qui iam salutavimus

virginem per ave,
Nunc patrem et filium

non minus suave
Laudemus cum gloria,

sanctum quoque flamen
Semper et in saecula

saeculorum. Amen.