105. Super Ave Maria.

1. Ave, mater gratiae,

Virgo tu Maria,
Tota pulchra facie,

Mitis atque pia,
Stantibus in acie

Dux sis cum Messia,
Ne daemon fallaciae

Ducat nos de via.

2. Maria, o Ulium

Florens inter spinas,
Mentibus debilium

Praebens medicinas,
Conferas auxilium

Inter tot ruinas,
Placa nobis filium,

Aufer eius minas.

8. Gratia tu caelica

Plene irroraris,
Dum voce angelica

Blande salutaris,
Tandem vi deifica

Panem vitae paris,
De quo cum famelica

Plebe satiaris.

4. Plena ab initio

Gratia fuisti,
Carens omni vitio

Iesum concepisti,
Hunc sine supphcio

Laeta peperisti,
Cuius beneficio

Virgo permansisti.

5. Dominus, rex gloriae,

Qui creata regit,
Te, dulcis memoriae,

In arcam elegit,
Qua dispensatorie

Carnis arma tegit,
Quibus vi victoriae

Hostes nostros fregit.

6. Tecum spiritaliter

Deus angelorum,
Tecum corporaliter

Salus peccatorum,
Tecum est finaliter

Iesus, dux iustorum,
Tecum aeternaliter

Est merces sanctorum.

7. Benedicta filia,

David stirpe nata,
Fac nobis utilia

Moysis mandata,
Ut simus altilia

Ad immolandum grata,
Doce nos humilia

Comprimens elata.

8. Tu in mulieribus

Virgo singularis,
Quae castis visceribus

Deum nobis paris,
Purga a sceleribus

Precibus praeclaris
Bonisque operibus

Frui largiaris.

9. Et benedictus igitur,

Qui se cibum dedit,
Quo homo reficitur,

Qui per fidem credit,
Qui a patre mittitur,

A quo non recedit,
Carne per te gignitur

Et ad patrem redit.

10. Fructus indeficiens

Salus est languentum,
Iesus, et reficiens

Cordis munimentum,
Nos per te reficiens

Vitae det fomentum,
Qui cunctis sufficiens

Nescit detrimentum.

11. Ventris secretarium

Regum rex intravit
Et quasi sacrarium

Hoc inhabitavit,
In quo thesaurarium

Se nobis paravit,
Ex quo necessarium

omne propinavit.

12. Tui status gratia

Fundimus precamen,
Des emendae spatia

Praebens adiuvamen,
Ne pro contumacia

Puniat examen,
Sed nos ad palatia

Caeli ducat. Amen.