132. Super Ave Maria.

1. Ave, terra, quae non sata
De qua virens herba nata

Per praeceptum Domini,
Maria, tu reparatrix,
Orbis es illuminatrix,

Unde salus homini.
2. Gratia, quam repperisti,
Toti mundo subvenisti,

Gloriosa domina,
Plena benedictionis
Praesides in caeli thronis

Habens mille nomina.
3. Dominus te decoravit
Ac mirifice dotavit,

Sponsus amantissimus,
Tecum filius est patris,
Eligens te vice matris

Princeps potentissimus.
4. Benedicta virga Iesse,
Valens volensque prodesse

Supplicanti populo,
Tu laetitia iustorum,
Deo, regi angelorum,

Lac dedisti parvulo.

5. In te habens nil pollutum
Nobis iter para tutum

Post illud exsilium,
Mulieribus et viris,
Quae donasti modis miris

Deicum consilium.
6. Et tu, caeli margarita,
Peccatorum lux et vita,

Parens sine macula,
Benedictus sit creator
Tuus atque gubernator,

Deus ante saecula.
7. Fructus tuus est sublimis,
Quamvis sumitur ab imis

In salutem saepius,
Ventris pleni novi musti
Nec non rubi incombusti

Memoremur amplius.
8. Tui cordis innocentis,
Filio commonentis

Recordemur dulciter,
Iesus, flosculus suavis,
Amovendo nos a pravis

Recreet feliciter.

9. Christus regnans in supernis
Festis aptet nos aeternis

Cum beatis omnibus;
Amen dicat matri piae,
Sacrae virgini Mariae,

Quivis ex fidelibus.