96. Super Ave Maria.

1. Ave, iubar aethereum,
Lux rutilans in tenebris,
Ave, claustrum virgineum,
Honor decet te celebris
Iucuudaque laudatio,
Quia fluis vitae flumen
In vitiis enecatis
Atque claram reddis lumen
Animabus excaecatis,
Sol mundo nitet radio.

2. Maria, hoc nomen tuum
Nomen est admirabile,
Quo daemones posse suum
Sentiunt esse debile
Mortis confractis viribus,
Quia ipso invocato
A fideli fideliter
Cedunt tibi commendato
Daemonia celeriter,
Nocturna lux viantibus.

3. Gratia multa replentur
Recolentes te devote,
Et si malis detinentur,
Tu retrahis hos remote
Tyrannum trudens vinculo ;
Quia ergo non repellis
A te quemque viventium,
Serva servum a procellis
Me tradere quaerentium
In mortem a discipulo.

4. Plena misericordia
Et magnis beneficiis,
Per te sumens remedia
Resultat terra gaudiis,
Arbor decora, fulgida;
Quia per te se salvari,
Virgo, mundus videt clare,
Te conatur venerari
Et te viam cogitare.
Mens iam resurgat torpida.

5. Dominus, rerum creator,
Qui formavit nos de limo,
Per te noster fit salvator
Factus homo ventris imo,
Natus ineffabiliter ;
Quia culpa originis
Solvi solum sic poterat,
Ideo formam hominis
In te sumens, quam fecerat,
Poenas cucurrit fortiter.

6. Tecum autem humanitus
Inhabitans Deus unus,
Virginale divinitus
Conservavit tibi munus,
Beata mater munere;
Quia per te declaratur
Mirabile mysterium,
Omne genu nunc curvatur
Tibi, mater, ob filium
Iam lucis orto sidere.

7. Benedicta, benedicas
Tibi benedicentibns,
Mentes nostras fac pudicas
Pulsis malis spiritibus,
Absistat et vecordia;
Quia per te fidelibus
Benedixit iam creator,
Ab ipso tuis precibus
Benedictus sim peccator,
Perfusa caeli gratia.

8. Tu es tantae dignitatis,
Quod reperit nullus talem,
Vera mater veritatis,
Deum nobis dans sodalem
Per carnis contubernium ;
Quia ergo, virgo pura,
Talis tantaque diceris,
Dei merito factura
Adorat te prae ceteris
Caelestium, terrestrium.

9. In me, mater, cotidie
Operare per gratiam,
Aperi venam veniae
Petenti indulgentiam
Ad laudem tui nominis;
Quia habes potestatem
Et ligandi et solvendi,
Propter tuam pietatem
Me mali plenum horrendi
Absolve nexu criminis.

10. Mulieribus honorem
Confers, gemma mulierum,
Vivendique novum morem
Et gaudium praebes verum,
Quod Eva tristis abstulit;
Quia in carne posita
Praeter carnem tunc vixisti,
Humilitati dedita,
Ex te nata caro Christi
Nos abluendo sustulit.

11. Et ideo in hoc mundo
Laudem cape principalem,
In alto et in profundo
Habens vim imperialem,
Versa vice mortalium;
Quia per omne saeculum
Sic mereris exaltari,
Virgo, tuum me famulum
Te laudare fac conari,
Infirma tu scis virium.

12. Benedictus sit genitus
Ventris tui generosi,
Per quem nobis introitus
Regni patet gloriosi,
Gaudet chorus caelestium;
Quia ipsi diminuti
Ab angelis superbia
Passo nato restituti
Homines sua gratia,
Invicta spes credentium.

13. Fructus vitae multiplicat
Vim virtutis magnae suae
Et animas purificat
Fructu sanctae carnis tuae,
Quae sola virgo parturit ;
Quia fructus, quem das mundo,
O Maria, spes supplicum,
Actu viget tam fecundo,
Alas eo famelicum,
Per quem nec ales esurit.

14. Ventris tui sanctissimi
Claustro nullus habitavit,
Nisi verbum altissimi,
Qui virginem te servavit
Hostis a telo perfidi ;
Quia ergo cuncta vales
Apud Iesum impetrare,
Fac, Maria, nos mortales
Per gratiam cursitare
Ad cenam agni providi.