135. Super Ave Maria.

1. Ave, tu es paradisus,

in quo Deus graditur.
Ave, audis os loquentis,

quo Adam corrigitur,
Ave, capis verbum fantis,

quo serpens conteritur,
Ave, verbum habes entis,

quo daemon convincitur,
Ave, ex te fructus vitae,

quo vita perficitur.
2. Maria tu viribus

inclitis ditaris,
Maria tu moribus

Ethicis amaris,
Maria virtutibus

Herois vocaris,
Maria charismatibus

Omnibus bearis.
3. Gratia sublimior

caelis comparata,
Gratia splendidior

sole illustrata,
Gratia capacior

totum comprehensa,
Gratia fecundior

Deum es enixa.
4. Plena temperantia

innata fundaris,
Plena tu prudentia

mox sanctificaris,
Plena intelligentia

Deum contemplaris,
Plena sapientia

ipsum amplexaris.

5. Dominus in pectore

tuo commoratur,
Dominus ex utero

tuo nobis datur,
Dominus ex ubere

tuo tuo satiatur,
Dominus officio

tuo procuratur.

6. Tecum est in gremio,

ubi consolatur,
Tecum est in brachio,

in quo baiulatur,
Tecum in exsilio,

in quo transportatur,
Tecum in imperio,

in quo coronatur.

7. Benedicta divino

munere gloriaris,
Benedicta angeli

famine salutaris,
Benedicta humano

carmine praelaudaris,
Benedicta imagine

rerum praesignaris.

8. Tu es nubes montis legis,

qua maiestas loquitur,
Tu es vellus Gedeonis,

quo Christus induitur,
Tu es spica septiformis,

qua Aegyptus pascitur,
Tu es Cherub, templum Dei,

quo deitas panditur.

9. In rubo virginitas

igne non crematur,
In fornace deitas

igne temperatur,
In virga viriditas

sicca fecundatur,
In prole integritas

sincera sacratur.

10. Mulieribus piis
praees bonitate,
mergens caritate,

Mulieribus praees
iustis probitate,
vincens dignitate,

Mulieribus puris
praees castitate,
nitens claritate,

Mulieribus sacris
praees sanctitate,
sistens deitate.

11. Et ut ligno vermiculus

in te figuratur,
Et in aquae igniculus

nube reservatur,
Et in terra secretius

lapsis impraegnatur,
Et ex Maria parvulus

gigas demonstratur.

12. Benedictus exitus

talis producturae,
Benedictus vasculus

talis recepturae,
Benedictus flosculus

talis floriturae,
Benedictus titulus

talis perfecturae.

13. Fructus enim Mariae

emittit odorem,
Fructus huius abunde

excellit dulcorem,
Fructus cuius valide

abicit languorem,
Fructus tui fervide

Inflammat amorem.

14. Ventris,

quem pater praeordinavit,
ut thalamus fieret,

Ventris,

quem pneuma sanctificavit,
ut virgo conciperet,

Ventris,

quem filius subintravit,
ut sponsus procederet,

Ventris,

quem Phanuel aperuit,
ut nobis afflueret.

15. Tui, crater Salomonis

non indigens poculo,
Tui, calix Pharaonis,

pincernae salvatio,
Tui, vitis sponsionis,

vini nobis potio,
Tui palmes trinitatis

monstratur in filio.

16. Iesus, patris filius,

matrem fecundasti,
Iesus, verbum verius,

nos illuminasti,
Iesus, dux es praevius,

recte gubernasti,
Iesus, Mariae filius,

pie nos salvasti.

17. Sancta quia germine,

sancta es et prole,
Sancta es et corpore,

sancta es et mente,
Sancta es et opere

et intentione,
Sancta vitae ordine

et integritate.

18. Maria, praesagine

re et ratione,
Maria, ex flumine

foedos emundare,
Maria ex lumine

nos illuminare
Maria, progenie

natos adoptare.

19. Ora, ancilla Dominum,

cui placuisti,
Ora, mater, filium,

quem tu genuisti,
Ora, casta, spiritum,

per quem concepisti,
Ora, nupta, sponsum,

quem apprehendisti.

20. Pro tui clementia,

qua sic dilexisti,
Propter nati vulnera,

quibus redemisti,
Propter tui viscera,

quibus doluisti,
Pro nostri miseria,

cui subvenisti,

21. Nobis dones meritum

iustificatorum,
Nobis reddas terminum

glorificatorum,
Nobis reddas praemium

omnium sanctorum,
Nobis praestes bravium

vere coronatorum,
Nobis des imperium

regni aeternorum.
22. Amen, angelicum carmen,

sit nobis in omine

per sacram spiramen,
Amen, gloriosum lumen,

verum habet numen

nostrum expiamen

Amen, tuum obumbramen,

da nobis solamen,

quod est sanctum flamen
Amen, sit tuis iuvamen,

Securum tutamen,

tuum deprecamen.