81. Officium Defunctorum,

Ad Matutinum.

1. Deus aeternae gloriae,
Pater misericordiae,
Sanctorum desiderium
Et animarum refrigerium,

2. Ecce, fideles animae
Ad te proclamant anxie
In earum miseriis,
Gratiae tuae memineris.

3. Non ut iudex aequissimus
Poenis damnes ultricibus,
Sed ignosce reatibus
Et parce cruciatibus.

4. Iesu benignissime,

Redemptor clementissime,
Defunctis fidelibus
Sis mitis et propitius,

5. Quo tibi, regi gloriae,
Cum triumpho victoriae
In voce laudes consona
Iucunda dent praeconia.

Ad Laudes.

1. Splendor paternae gloriae,
In regnum tuum suscipe,
Quas pretioso sanguine
Dignatus es redimere.

2. Et per tuam clementiam
Da eis indulgentiam,
Ultrices poenas remove
Easque pie refove.

8. Pro illorum requie
Supplicamus, Domine,
Quibus donasti in te credere,
Ut digneris veniam dare.

4. Quae pro earum reatibus
Traditae sunt cruciatibus,
Iube liberari quantocius,
Ut tecum gaudeant plenius.

5. Sit, Christe, rex piissime,
Tibi cum patre gloria
Et spiritu paraclito
Et nunc et in perpetuum.

Ad Primam.

1. Iam lucis atque gratiae
Largitor benignissime,
Qui es sanctorum gloria,
Laus, honor et laetitia,

2. Miserere gemituum
Fidelium spirituum,
Qui circumdantur tenebris,
Angustiantur miseriis.

3. In tuae lucis gratia
Percipiant solacia
Aeternae beatitudinis
Una cum lucis filiis.

4. O benedicta trinitas,
Tua praestet benignitas,
Ut omnes fideles animae
Aeterna fruantur requie.

Ad Tertiam.

1. Nunc veni, sancte spiritus,
Et adesto propitius
Omnibus fidelibus
In poenis exsistentibus.

2. Relaxans eis debita,
Ut non secundum merita
Poenis crucientur
Sed pie liberentur.

3. In tuo dulci nomine,
Precamur, paraclite,
Sit tua visitatio
Animarum salvatio.

Ad Sextam.

1. Rector potens viventium
Salusque morientium,
Defunctis fidelibus
Miserere propitius.

2. Qui tua sunt plasmatio,
Tua sint salvatio,
Pro quibus tuo proprio
Non pepercisti filio.

3. In eis reminiscere
Omnis misericordiae,
Ut tua dulci praesentia
Fruantur in laetitia.

Ad Nonam.

1. Rerum Deus omnium,
Qui es sanctorum gaudium,
Miserere, quaesumus,
Defunctis fidelibus.

2. Latroni per clementiam
Qui donas indulgentiam,
Dignare eis parcere
In tormentorum carcere.

3. Per matris tuae merita
A poenis eas libera,
Ut earum gaudium
Sis per omne saeculum.

Ad Vesperas.

1. Iesu, redemptor saeculi,
Verbum patris altissimi,
Lux lucis invisibilis,
Custos tuorum pervigil.

2. Tu fabricator omnium
Discretor atque temporum,
Fessas labore recipe
Tua pietate animas.

3. Quae reversum ab infcris
Laetis vidisti oculis,
Mater, dilectum filium,
Fac ipsis hunc propitium,

4. Hunc ut placatum cernere
Et ipso possint perfrui
In requie perpetua
Et sempiterna gloria.

5. Praestet illis hanc gratiam
Idem tuus filius,
Qui regnat in perpetuum
Cum patre et sancto spiritu.

Ad Completorium.

1. Christe, per tua vincula,
Crucem, mortem et vulnera
Succurre tuis famulis
Opem ferendo miseris.

2. Et hoc precamur supplices,
Ut eas ab hoste liberes,
Ne valeat torquere
Tuo redemptas sanguine.

3. Misericordissime Domine,
Ne patiaris eas perire,
Sed magis tuae creaturae
Succurre clementissime.

4. Praesta, pater, per filium,
Praesta per almum spiritum,
Ut animis fidelium
Sis semper omne gaudium.