143. Super Ave Maria.

1. Ave, virgo gloriosa,

Peccatorum consolatrix,
Ave, dulcis speciosa,

Ave, nova reparatrix,
Ave, scandens velut rosa,

Castitatis conservatrix,
Ave, mater fructuosa,

Miserorum miseratrix.
2. Maria, plena gratiae,

Ab angelo salutata,
Maria, pulchra facie,

Super caelos exaltata,
Maria, regis gloriae

Mater et virgo beata,
Maria, precor hodie,

Dilue mea peccata.

3. Gratia Deus replevit

Te per hoc verbum suave,
Gratia totam complevit,
Cum Gabriel dixit Ave,

Gratia in te quievit,

Qui nos liberavit a vae,
Gratia tua delevit

Parentum reatum grave.
4. Plena virtutum Maria,

Virgo Deum concepisti,
Plena oboedientia

Cum ancillam te dixisti,
Plena caelesti gratia,

Virgo Deum peperisti,
Plena misericordia,

Summo Deo placuisti.
5. Dominus praevidit sibi

In te suum sacrarium,
Dominus elegit ibi

Suum reclinatorium,
Dominus hic, non alibi,

Fecit suum palatium,
Dominus donavit tibi

Unicum suum filium.

6. Tecum Deus, virgo pura,

Fecit suum obumbramen,
Tecum sua genitura

Venit per angeli flamen,
Tecum divina natura

Habet suum respiramen,
Tecum omnis creatura

Postulat suum iuvamen.

7. Benedicta virginitas
Viget in te in aeternum,
Benedicta sit castitas,

Quae dedit Deum aeternum,
Benedictaque unitas,

Quae fecit tempus moder-
num
Benedicta nos trinitas
Conservet in sempiternum.

8. Tu es stella matutina,

Quae illuminas patriam,
Tu sola stella marina,

Quae nos reducis ad viam,
Tu sola vera regina,

Quae quaeris sapientiam,
Tu dulcissima domina,

Quae portas auri copiam.

9. In te, virgo, sunt sperantes

Adflicti et peccatores,
In te fugiunt clamantes

In hoc mundo viatores,
In te exsultant cantantes

Omnes viri bellatores,
In te, mater, deviantes

Recipiunt bonos mores.

10. Mulieribus pulchrior,

Virginum serenissima,
Mulieribus sanctior,

Sanctarum beatissima,
Mulieribus altior,

Cunctarum nobilissima,
Mulieribus dulcior,

Omnium suavissima.

11. Et dignior omni laude,
Ab omnibus veneranda,
Et permanens sine fraude
Super omnes praeamanda,

Et tu, mater virgo, gaude,
Quia tu es adoranda,

Et in throno sedens plaude,
Quia semper es laudanda.

12. Benedictus sit creator,

Qui te Mariam elegit,
Benedictus sit bellator,

Qui in cruce pugnam egit,
Benedictus sit salvator,

Qui inferni claustra fregit,
Benedictus gubernator,

Qui caelum et terram regit.

13. Fructus Mariae virginis

Ecclesiam restauravit,
Fructus superni numinis

Synagogam escaecavit,
Fructus aeterni luminis

Nos caecos illuminavit,
Fructusque sui sanguinis

In se credentes salvavit.

14. Ventris partus mirabilis

Fide et flore floruit,
Ventris porta tam nobilis,

Nunquam homo te polluit,
Ventris fructus spectabilis

Nos sacram fidem docuit,
Ventris cibus amabilis

In Bethlehem emicuit.

15. Tui filii sanguine,

Maria, sumus lavati,
Tui nati certamine

Sunt daemones spoliati,
Tui fructus iuvamine

Sunt captivi liberati,
Tui partus in nomine

Sunt omnes iusti salvati.

16. Amen debemus dicere

In fine huius operis,
Amen, fac nos recurrere

Ad partem tui foederis,
Amen, fac nos te edere,

Qui panis vitae crederis,
Amen, fac nos quiescere

Tecum cum sanctis ceteris.