65. De sancto Francisco.
Ad Matutinum.

1. Crucis arma fulgentia
Nocte Franciscus dormiens
Vidit, dicentem audiens:
Haec tua erunt omnia.

2. Sit Christo laus et gloria,
Qui cruce nos insigniens,
Patri sancto oboediens
Offert nobis caclestia.

Ad Laudes.

3. Crucis ut ad supplicia
Christum Franciscus posituri
Vidit et audit monitum:
Haec sequere vestigia.

4. Sit crux nostra devotio,
Sit et nostrum solacium,
Ad quam Francisci studium
Ibat et imitatio.

Ad Primam.

5. Crucis vox hunc adloquitur
Sibi dicens: te praepara,
Vade, Francise, repara
Domum meam, quae labitur.

6. Laus illi, per quem regitur
Sacra domus ecclesiae,
Quae sanctorum prudentiae
Reparanda praecipitur.

Ad Tertiam.

7. Crucis verbum proponitur
Fratribus per Antonium,
Et Franciscus ad ostium
In modum crucis cernitur.

8. Sit laus illi, qui creditur
Hoc fecisse miraculum,
Quo Francisci corpusculum
Diversis locis ponitur.

Ad Sextam.

9. Crucis arbor eximia
Per os Francisci surgere
Apparens facit fugere
Draconem et daemonia.

10. Sit Christo laus et gloria,
Qui nos facit devincere
Daemones et contemnere
Mundum et eius vitia.

Ad Nonam.

11. Crucis magnum mysterium
Super Franciscum claruit,
Dum praecinctus apparuit
Cruce duorum ensium.

12. Sit laus et praeconium,
Qui crucis arma praebuit,
Quibus Franciscum induit
Adversus adversarium.

Ad Vesperas.

13. Crucis apparet hostia
Ensis in crucis manibus
Sex alis tecto variis
Cum vultus elegantia.

14. Qui Francisci cor attrahit,
Augens ei charismata
Suaque donans stigmata
In eius carne protrahit.

Ad Completorium.

15. Crucis signum Tau litera
Fronte Francisci scribitur,
Quae varia distinguitur
Mirandae lucis opera.

16. Quem et nos Christi gratia,
Dei servos in frontibus
Assignet et in sensibus
Pro perenni custodia.