52. Cursus de VII Gaudiis B. M. V.

Ad Matutinum.

1. Novum salutis gaudium
Caelesti sponsae mittitur,
Dum verbi per mysterium
Sub carne verbum clauditur.

2. Sermone blando nuntiat
Fulgenti veste rutilans,
Ut mira verbo faciat
Virgo Deum obnubilans.

3. Modi secretum reserat
Fortis de caelo veniens,
Quod per te lapsum reparat,
Virgo Deum concipiens.

4. Concepto, virgo, filio
Culpae reatum diluas,
Floris candentis lilio
A sorde mentes abluas.

5. O dulcis virgo virginum,
Pro tam sollemni gaudio
Devicta morte criminum
Concepto iunge filio.

Ad L audes.

1. Alvus tumescit virginis
Serato ventris vasculo,
Virga florescit germinis
Clauso carnis ergastulo.

2. Venter puellae baiulat
Alti secreta conscia,
Verbum, quo virgo rutilat,
Carnis labentis nescia.

3. Arto condens cubiculo
Aeterni patris filium
Confracto culpae iaculo
Ducat ad caeli gaudium.

4. Virgo fluens deliciis,
Quae pascis inter lilia,
Pro laetis his primordiis
Concepti des solacia.

5. Gloria tibi, domina,

Quae regem geris omnium,
Dimittat nobis crimina
Caelorum prece civium.

Ad Primam.

1. Gaude, mater, in gaudiis,
Dum virgo paris filium,
Novis psalle praeconiis
Novum ferendo lilium.

2. Noctis silente medio
Verbum in carne loquitur,
Cum novi cantus gaudio
Verbum de caelo mittitur.

3. Lumen de caelo rutilat
Nati fulgente gloria,
Pater in terris iubilat
Novi partus laetitia.

4. Memento, virgo regia,
Quae regem paris omnium,
Quod pro culpae miseria
Tu Dei lactas filium.

5. O dulcis virgo virginum,
Pro tanti partus gaudio
Devicta morte criminum
Nos nato iunge filio.

Ad Tertiam.

1. Gaude, mater cum parvulo,
Rege nascente gloriae,
Quem parvo geris vasculo,
Fert mundo munus gratiae.

2. Intrant magi cubiculum
Regis regentis sidera,
Et matris sacrum uterum
Et sacra laudant ubera.

8. Artum cernunt praesepium
Sub clarae lucis radio
Et castum matris gremium
Grato repletum filio.

4. O quantum matris gaudium,
Cum natus sugit ubera,
Cuius altum dominium
Monstrant caelorum sidera.

5. Gloria tibi, domina,
Rege regentem sidera,
In caeli regis curia
Nos tua pascant ubera.

Ad Sextam.

1. Adest triumphus nobilis,
Quo pia mater gratiae,
Pro Christi morte flebilis,
Concernit regem gloriae.

2. Sermone blandus angelus
Regem viventem nuntiat,
Ut novi cantus iubilus
Te, virgo, laetam faciat.

3. Patris potestas regia

Magnum de terra gaudium
Verbi fulgente gloria
Dat matri reddens filium.

4. O felix vere hostia,
Divae matris suffragio
Ad caeli duc nos ostia,
Quae tua pandit passio.

5. Laus matri regis gloriae
Pro resurgentis gloria,
Quae nos cum signo gratiae
Ducat ad caeli gaudia.

Ad Nonam.

1. Gaude, regina gloriae,
Novo perfusa gaudio,
Nam Christus, rex iustitiae.
Transit in nubis solio.

2. Tremunt videntes angeli
Regis ascensum nobilem,
Quem pro cursu mirabili
Mirantur venerabilem.

3. Grata regis ascensio
Dat matri consistorium
Et pietatis atrio
Dulce reclinatorium.

4. Tu esto nostrum gaudium,
Praedulcis mater gratiae,
Et post praesens exsilium
Duc nos ad thronum gloriae.

5. Gloria tibi, domina,
Rege regnante gloriae,
Dimitte nobis crimina
Cum signo divae gratiae.

Ad Vesperas.

1. Beata matris gaudia
Misso de caelis spiritu
Nostra replent praecordia
Flammis, caelesti sonitu.

2. Virgo parens spiramine
Verbum in carne protulit,
Quod recumbente lumine
Ignem de caelis attulit.

3. Linguis fantur magnalia
Fecundae partus virginis
Corda dudum carnalia
Caelesti dono numinis.

4. Hora recumbens tertia
Sancto repletur spiritu
Virgo perfusa gratia
Caeli tonante sonitu.

5. Veni, creator spiritus,
Per piae matris merita
Et luce fusa caelitus
Nos somno mortis excita.

6. O virgo clementissima,
Pro tanti festi gaudio
Fac nos mente promptissima
Tuo dignos servitio.

7. Sit laus matri cum filio
Flamma fulgente caelitus,
Qui nobis in exsilio
Donet charisma spiritus.

Ad Completorium.

1. Gaude, mater, in gaudio
Tantis referta gaudiis,
Caeli locata solio
Nati fruens deliciis.

2. Enixa virgo virgini,
Decoro sponso virginum,
Sanctorum consors agmini
Sono praecellis carminum.

3. Sanctos excedis meritis,
Amoris privilegio,
Castis stringendo gremiis
Natum in cordis iubilo.

4. Tibi congaudent virgines
Sertis ornatae roseis
Et constipatae liliis,
Albis fulgentes niveis.

5. Ergo gaudet cum filio
Tantis dotata dotibus,
Fulgens ex lucis radio,
Trinis locata sedibus.

6. Assiste, virgo virginum,
Ostendens nato viscera,
Ne mors devoret criminum,
Pro quibus suxit ubera.

7. Conforta, virgo, tepidos,
Peccati pressos vulnere,
Nec diu sinas trepidos
Torpentes carnis pondere.

8. Precare, mater, filium
Pro lapsu fratrum ordine,
Reduc nos ad principium
Sancto flante spiramine.

9. Gloria tibi, domina,
Assumpta super sidera,
In caeli regis curia
Fruamur tua gratia.