88. Super Ave Maria.

1. Ave, desiderii

Flos et fons decoris,
Hortus refrigerii

Suavitas odoris,
Victrix improperii,

Speculum honoris,
Filia imperii

Parens conditoris.
2. Maria ut lilium

Florens inter spinas,
Mentibus humilium

Praebens medicinas,
Confer hic auxilium

Inter tot ruinas,
Placa nobis filium,

Aufer irae minas.

3. Gratia tu caelica
Plene irroraris,
Dum voce angelica
Pie salutaris,

Quem lex evangelica

Praedicat, tu paris
Quae, ut gens famelica

Pascatur, curaris.
4. Plena ab initio

Gratia fuisti,
Carens omni vitio

Iesum concepisti,
Quae sine supplicio

Laeta peperisti,
Cuius beneficio

Virgo permansisti.

5. Dominus, rex gloriae,

Qui creata regit,
Ut narrant historiae,

Matrem te elegit,
Dulcis es memoriae,

Per quam hostes fregit
Iesus, dux victoriae,

Quique mala tegit.

6. Tecum specialiter

Decus angelorum,
Tecum corporaliter

Salus peccatorum,
Tecum aeternaliter

Iesus, dux iustorum,
Tecum est finaliter

Merces saeculorum.

7. Benedicta filia,

David stirpe nata,
Secundum utilia

Moysis mandata
Libans volatilia

Pro eodem grata,
Qui levat humilia

Premens exaltata.

8. Tu in mulieribus

Virgo singularis,
Vinum das pauperibus

Mutans aquas maris,
Opprimi sceleribus

Ne nos patiaris,
Sed bonis operibus

Frui largiaris.

9. Et benedictus igitur
Corpus suum dedit
His, a quis diligitur,
Dum in cena sedit,

Te vidente figitur
Cruci, sic obedit,

Ac prae te erigitur,
Dum ad patrem redit.

10. Fructus indeficiens,

Sanitas languentum,
Est Iesus eiciens

Cordis nocumentum,
Qui cunctis sufficiens

Nescit detrimentum,
Nos per te reficiens

Vitae dans frumentum.

11. Ventris secretarium

Tui, virgo pia,
Dei est sacrarium,

Cuius nos in via
Omne necessariam

Sortimur, Maria,
Per te donum varium

Nobis detur pia.

12. Tui nati gratia

Fundimus precamen,
Ut vivendi spatia

Donans adiuvamen,
Ne pro contumacia

Puniat reamen,
Servos ad palatia

Caeli ducat. Amen.