79. Officium Defunctorum.

Ad Matutinum.

1. Deitatis paternitas

Et eius filiatio,
Spiritus sancti caritas

Et Iesu Christi passio
Trinitatisque pietas

Sit defunctis remissio
Peccatorum, ut claritas

Detur eis cum gaudio.

Ad Laudes.

2. Te laudamus divisorem

Tenebrarum et luminum,
Caeli, terrae creatorem,

Angelorum et hominum,
Iuvenum, senum factorem,

Corruptarum et virginum,
Omnis mundique rectorem

Spiritus laudet Dominum.

Ad Primam.

3. Veni, creator spiritus,

Mentes tuorum visita,
Per quem mundus est conditus

Et omnia sunt condita,
Qui a nullo es conditus

Dimitte cunctis debita,
Ita quod nullus perditus

Sit propter sua merita.

Ad Tertiam.

4. Deus, a quo sunt omnia

Bona, dona victoriam
Contra omnia vitia

Vivis, defunctis veniam,
Ut post haec transitoria

Veniamus ad gloriam,
Defuncti quoque gaudia

Possideant per gratiam.

Ad Sextam.

5. Ostende nobis faciem

Tuam, praemium sanctorum,
Cum venerimus ad diem

Irae et iudiciorum,
Iustitiae saevitiem

Mitiga, dans peccatorum
Veniam atque requiem

In saecula saeculorum.

Ad Nonam.

6. Virgo carens criminibus,

Te precor, ut auxilio
Totisque tuis precibus

Sis coram tuo filio
Pro fidelibus omnibus

Sic, quod tua petitio
Cum sanctorum agminibus

Locet eos cum gaudio.

Ad Vesperas.

7. Vos deprecor suppliciter

Intuitu pietatis
Omnes sanctosque pariter

Sanctas, ut intercedatis
Pro cunctis reis taliter,

Quod in fine cum beatis
Collocentur benigniter

Ante thronum trinitatis.

Ad Completorium.

8. In manus tuas, Domine,

Commendo spiritum meum,
Ut sicut dubio sine

Hominem te credo Deum,
Qui pretioso sanguine

Redemisti mundum reum,
Sic hominem de crimine

Salva, qui creasti eum.

Conclusio.

9. Has horas tibi metricas

Cum pia devotione
Tibi dico canonicas

Et cum pia ratione,
Ut animas catholicas

Tua miseratione
Efficias glorificas

Tua sancta visione.