45. De Compassione BMV.

Ad Matutinum.
1. Dum Christi mater inclita,

caelica regina,
Audit captum filium

hora matutina,
Cor est concussum virginis,

simul et expavit,
Et hic rumor virginem

nimis exturbavit.

A d Primam.

2. Hora prima filium

caesum et adflictum
Cernit et ab impiis

vinculis astrictum,
Ad Pilatum praesidem

duci cum clamore,
Expavit eius spiritus

cordis prae dolore.

Ad Tertiam.

3. Dum hora venit tertia,

vidit flagellatum,
Indutum quoque purpura,

spinis coronatum,
Crucis quem supplicio

praeses condemnavit,
Tunc doloris gladius

cor matris penetravit.

A d Sextam.

4. Hora sexta filium

vidit conclavari
Clavis acutissimis

in cruceque levari,
Transfigi membra geniti

sanguinemque fundi,
Inde fit exanimis

dominatrix mundi.

Ad Nonam.

5. Hora nona filium

attendit clamitantem
Prae dolore nimio

et caput inclinantem,
Mariae dulcis filius

tunc moriens defecit,
Doloris ensis animam

ipsius tunc perfecit.

Ad Vesperas.
6. De cruceque depositum
hora vespertina
Tenet inter brachia

caelica regina,
Tergit, ungit vulnera,

flet et osculatur,
Dulcissimae cor virginis
gladio vulneratur.

Ad Completorium.
7. Sepulturae deditum
occidente die
Magnum est supplicium

virgini Mariae,
Dulci carens filio
mater benedicta
Est doloris gladio
graviter adflicta.

Conclusio.
8. Hunc sermonem, domina,
tibi cum amore,
Virgo mater, offero

tuo pro dolore,
Quem digneris, clementissima,

acceptare gratum
Meque tecum iugiter
facere beatum.