92. Super Ave Maria.

1. Ave. fulgens maris stella,
Salve, Moysis fiscella,

Ave, virgo regia,
Maria, quae sine viro
Peperisti modo miro

Deum, per quem omnia.

2. Gratia tu singulari
Meruisti fecundari

Paritura puerum,
Plena tu virtutum rore,
Parientis sine more
Non dolebas uterum.

3. Dominus hominem sumens,
Deum verum non consumens

Incarnari voluit
Tecum et per te, natura
Ut mutaret sua iura,
Nasci de te voluit.

4. Benedicta virgo Christi,
Quae serpentis contrivisti

Caput veneniferum,
Tu mutasti nomen Evae
Et vindictam mortis saevae

Per verbum deiferum.

5. In conclavi sumis Ave,
Verbum bonum et suave,

Ave, plenum gratiae,
Mulieribus prae cunctis,
Vivis nempe vel defunctis
Inventrix es gratiae.

6. Et totius bonitatis
Fons es, de quo pietatis

Emanant deliciae,
Benedictus tuus fructus,
Qui delevit taetros luctus

Humanae miseriae.

7. Fructus tuus, o quam dulcis,
Quo nos refoves et fulcis

Contra carnis vitia,
Ventris tui fructum praesta
His, qui colunt tua festa

Alacri memoria.

8. Tui sumus, nos emenda,
Emendatos nos commenda

Iesu, tuo filio
Amen, amen ut cantemus,
Tecum simul ut regnemus

In caeli palatio.