89. Super Ave Maria.

Ave ex patris omnipotentia,

Ave ex filii sapientia,

Ave ex spiritus sancti benignitate dulcissima.

Maria caelum et terram illuminans,
5. Gratia plena infundens omnes

Et replens te diligentes.

Dominus tecum, Dei patris unicus

Ac tui virginei cordis unigenitus,

Amicus et sponsus dulcissimus.
10. Benedicta tu in mulieribus,

Quae Evae fugasti maledictionem

Et aeternam impetrasti benedictionem,

Et benedictus fructus

Ventris tui, Iesus Christus,
15. Omnium creator ac Dominus,

Omnia benedicens et sanctificans,

Omnia vivificans et locupletans.

Fons signatus distillans oleum,

Para nobis cibum aethereum,
20. Pietatis et rorem melleum

Et emunda cor nostrum felleum.

Benedicta (tu) in mulieribus,

Quae de tuis castis visceribus,

Plena semper donis caelestibus,
25. Peperisti pacem hominibus.

Tu es civitas superni numinis,

Tuque claritas caelici luminis,

Tu es dignitas nostrae propaginis

Tuque pietas summae dulcedinis.