145. Super Ave Maria.

1. Ave, virgo,

regina gloriae,
Vitae via,

dux sanctimoniae,
Spes salutis,

flos pudicitiae,
Fons dulcoris,
mater munditiae,
Labe carens.

2. Maria, tu

es virgo omnium,
Virgo prudens,

prima prudentium,
Invenisti

salutis gaudium,
Quod amisit
per gulae vitium
Prima parens.

3. Gratia, quam
nulla promeruit,
Tibi datur,

et gratis adfuit
Gratiarum

dator, dum voluit
De te nasci,

hunc, qui te genuit,
Genuisti.

4. Plena fulges

virtutum gratia,
Nam fit in te

carnis substantia
Verbum patris
et sapientia,
Sine patre

dum patrem filia
Peperisti.

5. Dominus te

sacrans in utero
Educavit

amore tenero
Et a gressu

conservans aspero
Pedem tuum

semper in prospero
Dirigebat.

6. Tecum fuit
in hoc itinere
Dux et comes

firmato foedere,
Orto sole

de suo sidere
Ius naturae

partu puerperae
Obstupebat.

7. Benedicta,

quae Dei filium
Concepisti

aure per nuntium,
In conceptu

viri consortium
Non experta
carnis incendium
Nesciebas.

8. Tu es, in qua
miro commercio
Fit et verbi

et carnis unio,
Semper vernans

pudore proprio
Poenam partus
in puerperio
Non habebas.

9. In hoc partu
natura siluit,
Caelum canit,

sidus apparuit,
Magus credit,

pastor obstupuit,
Bos cognovit,
asellus docuit
Adorare.

10. Mulieribus

aufert opprobria
Partus ille

dans mundo gaudia,
Obierunt

mors et miseria
Nato Iesu,

qui venit vitia
Relaxare.

11. Et tu, felix

virgo puerpera,
Gaude, cuius

intacta viscera
Ediderunt,

Iactarunt ubera,
Quem non valent
tellus et aethera
Continere.

12. Benedictus
sit Dei filius,
Factus nobis

per te propitius,
Carne frater,

natura socius,
Culpae carnis
expers et nescius
Erat vere.

13. Fructus venit

de te, christifera,
Per quem perit

virus et vipera,
Quae inflixit

peccati vulnera
Et a morte

stirps Adae misera
Liberatur.

14. Ventris tui
fructificatio
Mundi salus

est et redemptio,
Animarum

vera refectio,
Panis vivus,
quo caeli contio
Satiatur.

15. Tui, mater,

honoris dignitas
Laudes nescit

habere tacitas,
Tibi preces

offerre placitas
Opem nobis

det sancta trinitas
Et virtutem.

16. Amen dicant

omnes et singuli,
Ordo, sexus,

senes et parvuli,
Gens Iudaea,

fidelis populi,
Quos perducat
salvator saeculi
Ad salutem.

17. Fili Dei

nostraeque virginis,
Mediator

Dei et hominis,
Miserorum

tuae propaginis,
Quos redemit

crux tui sanguinis,
Miserere.

18. Iesu pie,

patris potentia,
Piae matris

prece propitia
Solve reos

a faecis scoria
Et solutos

tecum in gloria
Fac gaudere.

Cod. Parisin. 11343 saec. 15.

19. Alma virgo,

da mihi misero
Te laudanti,

ut cursu propero
Litus tendam,

quo timens propero,
Tutus tamen,
si tuum sensero
Adiuvamen.

20. Teque rogo,

mi dulcis domina,
Ut quicunque

haec laudum fragmina
Tibi psallunt,

eorum nomina
Conscribantur
in vitae pagina;
Fiat, Amen.