36. Cursus de ss. Angelis.
Ad Matut. et Vesp.

1. A summo choro Seraphim
Concentum ad puerorum
Ardenter Christo Domino
Psallemus nunc altissimo.

2. Beata cuius genetrix
Semper virgo decorata,
Caritate inflammata
Est supra celsa Seraphim.

3. Creator aulae Cherubim,
Scientiae effluentis,
Susceptans formam servuli
Errores fugat saeculi.

4. Domus cuius sanctissima
Spiritus sancti gratia
Fit Christi habitaculum,
Mentium veri luminis.

5. E caelo iudex mittitur
In throno cuncta ruminans,
Laxare gratis vinculum,
Tyrannus sic deluditur.

6. Fit mater Dei famula.

Quod non erat, dum assumpsit,
Et matris nutu iudicans
Per cuncta mundi saecula.

7. Gloria tibi, Domine,
Qui natus es de virgine
Cum patre et sancto spiritu
In sempiterna saecula.

Ad Primam.

1. Hic patet in praesaepio
Dominus dominantium
Pastoribus stupentibus
Iubilum concinentium.

2. Ioseph, felix nutritius,
Et cor Mariae virginis
Mirantur super omnibus
Insuetis concurrentibus.

3. Katholicam ecclesiam,
Te deprecamur supplices,
Principatum principatu
Vincendo, Christe, complices.

4. Laus, honor, virtus, gloria
Deo patri et filio
Cum spiritu paraclito
In sempiterna saecula.

Ad Tertiam.

1. Mariae natus unicus
Patrisque unigenitus
Summi, bovis et asini
In stabulo qui socius,

2. Nunc matris pellat precibus
Potestatem malignorum
Spirituum electorum
Potestate angelorum.

3. O rex virtutum gloriae,
Peccata nostra ablue,
Virtutibus nos perfice
Et hostem semper comprime.

4. Praesta tu hoc, piissime
Pater et patris unice
Compar, cum sancto spiritu
Regnans per omne saeculum.

Ad Sextam.

1. Quem Chaldaeorum proceres
Visitant cum muneribus,
Hunc stella caeli indicat,
Sed quaerit rex, ut perimat.

2. Regis nati archangeli,
Altis qui praesunt omnibus,
Nati matris clementiae
Nos ducant ad caelestia.

3. Sepelit enses impius
Piorum in visceribus
Per nuntios satellites.
Ut tuorum angelorum,

4. Te poscimus, piissime,
Intercedente virgine,
A daemonum insidiis
Custodia nos protegas.

Ad Nonam et Complet.

1. Verbum caro cingatur,
Dum vibrat ensem carnifex,
Aegyptum inde visitat,
Quam olim plagis laeserat.

2. Xristus puer revertitur
Cum matre semper virgine
Post mortem regis impii,
Carentis aevo requie.

3. Ymaginem tu suscipe,
Quam recreasti hodie,
Similem tibi precibus
Et electorum meritis,

4. Zizania cum lolio
Repulsis nutu virginis,
Ut Adonay gloriam
Demus ylion in excelsis.