148. Super Ave Maria.

1. Ave, virgo virginum,

Flos et maris stella,
Sordes terge criminum

In vita novella,
Lumen gestans luminum

Puritatis cella,
Semper apud Dominum

Pro nobis interpella.

2. Maria, fons veniae,

Fons mellis et roris,
Fons misericordiae,

Puteus dulcoris,
Porta regis gloriae,

Parens salvatoris,
Grata tuae gratiae

Sit laus mei oris.

3. Gratia multiplici

Prole venustatis,
Quae dono semptemplici,

Spiritus ornaris,
Credens verbo simplici

Virgo, sanctum paris
Et mereris effici

Parens expers maris.
4. Plena medicamine

Sole purpurata,
Refecta libamine,

Nimis delicata,
Omni pulchritudine

Siderum ornata,
Lucis plenitudine

In matrem ditata.

5. Dominus, rex omnium.

Te, vas puritatis,
Sibi fecit solium,

Domum maiestatis,
Spiritus sacrarium,

Templum trinitatis,
Ut purgares lolium

Meae pravitatis.
6. Tecum iuncto numine

Verbum incarnavit
Genitor cum flamine,

Per quod liberavit
Nos ab omni crimine

Teque consecravit,
Quod lucens in virgine

Sol praefiguravit.
7. Benedicta, dirige

Nos ad te clamantes,
Pia mater, corrige

Filios errantes,
Concinentes dilige

Teque collaudantes,
Fluctuantes erige,

Doce ignorantes.

8. Tu in mulieribus

Tenes principatum,
Dignior es omnibus

Pariendo natum,
Celsior sideribus

Teste lingua vatum,
Constipata floribus,

Hortus voluptatum.

9. Et vallata liliis,
Rosis decorata,
Affluens deliciis,
Summo regi grata,

Virtutumque variis

Flosculis ornata,
In polorum gaudiis

Regnas exaltata.
10. Benedictus genitus

Patri coaequalis,
In secreto conditus

Aulae virginalis,
Descendit divinitus

Fieri mortalis,
Cuius nos interitus

Conservet a malis.

11. Fructus venerabilis

Matri gratiosus,
Gustu delectabilis,

Visu speciosus,
Cibus ineffabilis,

Cunctis fructuosus,
Defunctis est utilis,

Vivis pretiosus.
12. Ventris habitaculum

Digne commendatur,
In quo pacis osculum

Nobis propinatur,
Qui non novit masculum,

Alvus fecundatur,
A quo vitae pabulum

Nobis ministratur,
13. Tui ergo parvuli

Flumine renati
Supplicamus seduli

Sanctae trinitati,
Ut in fine saeculi

Simus ei grati
Et regnemus singuli

Secum coronati.