69. De sancta Katharina.

Ad Matutinum.
1. Virgo sancta Katharina

Iesum Christum desponsavit,
Sed mediante regina,

Quae Deum verum lactavit,
Hora [virgo] matutina

Haec iuvenis inchoavit,
Dum facta tota divina
Creatorem adamavit.

Ad Primam.
2. Ista est, quae Maxentium
Eloquenter exprobravit,
Errores malos gentium

Sagaciter improbravit,
Trinum unum, ens entium,

Luculenter adprobavit,
Sic laqueos venantium
Veraciter superavit.

Ad Tertiam.
3. Martyr sancta denudatur
A gente regis perfida,
Corpus eius laceratur,
Deinde Christo fida
In carcere mancipatur,

Ubi ab ave nitida
Dulcissime visitatur

Nunquam dilectrix fervida.

Ad Sextam.
4. Reginam et Porphyrium
Sua doctrina convertit,
Postea ad martyrium

Quemlibet eorum vertit,
Maxentii imperium

Haec adeo sic evertit,
Quod florentes ut lilium
Dominus eos advertit.

Ad Nonam.
5. Inter rotas haec sistitur
Fultas multis novaculis,
Sed illaesa eripitur

Ex divinis miraculis,
Gens Belial confunditur

E caelo magnis iaculis,
Virgo semper reperitur
Fide constans, immobilis.

Ad Vesperas.
6. Ad mortem tunc condemnata
Pro suis Deum oravit,
Eique sunt cuncta data

A Deo, quae postulavit ;
His concessis decollata,
Ex ea lac emanavit,
Et sic martyr Deo grata
Ad gloriam convolavit.

Ad Completorium.
7. Per sanctos angelos Dei

Corpus Katharinae sanctum
In altum montem Sinai

Sollemniter est portatum,
Unguentum sanctum olei

Est ab ipsa emanatum,
Ex quo salus datur ei,

Qui se ad hoc facit aptum.