108. Super Ave Maria.

1. Ave, mater pietatis,
Puella humilitatis,

Castitatis lilium,
Sanctum parans dignitati
Verbi patris incarnati

Ventris domicilium.

2. Maria, nubes nitoris,
Funde nobis stillas roris

Ac lumen scientiae
Ex triclinio fulgoris,
Ubi latet mel dulcoris

Et thesaurus gratiae.

3. Gratia fis praedotata,
Qua manens virgo sacrata

Es mater puerpera;
Dudum in rubo monstrata,
O tu rosa colorata,

Christo nos confoedera.

4. Plena Dei caritate,
Stella nitens claritate

Christi novi sideris,
Adornata venustate,
Decorata sanctitate

Super omnes crederis.

5. Dominus te fecundavit,
Suam matrem consecravit

Divino charismate,
Virtutibus illustravit,
Super caelos sublimavit

Flante sacro neumate,

6. Tecum, nobilis regina,
Sacra manet medicina

Mira efficacia,
Nos praeservans a ruina
Et confortans ad divina

Dei providentia.

7. Benedicta stella maris,
In decore singularis,

Caritatis vinculum,
Mihi, mater principalis,
Praesta, candor virginalis,

Iustitiae cingulum.

8. Tu speculum sanctitatis,
Signaculum castitatis,

Tus mirae fraglantiae,
Tu oleum lenitatis,
Ferculum divinitatis,

Murra paenitentiae.

9. In intimis nos irrora,

Ardens seu splendens aurora,

Virga florem germinans,
Cum sis nimium decora,
Pro nobis semper exora,

Summi lumen generans.

10. Mulieribus, o stella,
Per te, nobilis puella,

Datur benedictio,
Tu es aromatum cella
Et charismatum fiscella

Dedicata filio.

11. Et benedictus in donis,
Mater nostri Salomonis,

Sit, quae nobis contulit,
Qui iure redemptionis
Per vim suae passionis

Mortem nobis abstulit.

12. Fructus dulcis, fructus gratus,
Nostros purgans cogitatus,

Christus, rex iustitiae,
Qui maligni principatus,
Hostiles fregit conatus

Et sceptrum superbiae.

13. Ventris tui fons redundans
A peccatis mundum mundans

Dilabatur largius,
In gratiis est abundans,
Cum arens cor est fecundans,

Exuberat dulcius.

14. Sancta Maria, precare
Tuum sanctum salutare

Sanctumque paraclitum,
Ut velit nos illustrare
Et post mortem aggregare

Coetibus regnantium.