56. Horae beatae Mariae V.
Ad Matutinum.

1. Ave, decus trinitatis,
Theotocos maiestatis,

Emanans dulcedinem,
Ave, caeli paradisus,
Hortus clausus, non divisus,

Servans plenitudinem.

2. Vestem, ecce, praeparamus
Purpuream et rogamus

Te clementem dominam,
Ut confortes fluctuantes,
Hostes fuga adversantes

Donans nobis gratiam.

3. Phlegetontis a ruina
Nos custodi, o regina,
Et da caeli gloriam.

Ad Primam.

1. Salve, thronus deitatis,
Arca plena sanctitatis,

Venustate rosea,
Salve, speculum sanctorum,
Mater regis supernorum,

Caritate ignea.

2. Salve, murra semper fragrans,
Iugiter amore flagrans,

Pietate nitida,
Veste rubea ornari,
Teque prolem venerari

Fac nos, flos convallium.

3. Morum confer sanctitatem,

Mentis auge puritatem,

Dei contubernium.

Ad Tertiam.

1. Salve, mundi recreamen,
Peccatorum relevamen,
Huic orbi consolamen,
Dei mater inclita.

2. Salve, stella matutina,
Virgo, mater et regina,
Nos a morte repentina
Praeserva, carissima.

3. Stolam blaniam parare
Ac peccata emendare,
Ad superna respirare
Fac nos, pia domina.

Ad Sextam.

1. Ave, nardus humilis,
Corona virtutum,
Tellus inarabilis,
Imbecillis scutum.

2. Ecce, vestis grisea,
Stella vespertina,
Virgo et puerpera,
Rosa sine spina.

3. Ave, caeli gaudium,
Iter viatorum,
Nostrum privilegium,
Placatrix reorum.

Ad Nonam.

1. Salve, rosa paradisi,

Per quam hostes sunt divisi,
Tis calcaneo elisi,
Pax humani generis.

2. Salve, vitis irrigata,
Stola viridi ornata,
Dei donis decorata,
Vera spes terigenis.

3. Phoebus luna clarior,
Luna astris ceteris,
Sic Maria sanctior
Universis conditis.

Ad Vesperas.

1. Heu, Maria videt natum
Fixum cruci, desolatum

In monte Calvariae,
Videt Iesum cruentatum,
Circumquaque perforatum

Perfida ab acie.

2. Eia, mater benedicta,
Ligno crucis mente fixa,

Poenis plena animae.
Plagas Iesu contemplatur,
Gemit virgo, lacrimatur,

Tristi pallens facie.

3. Vestem nigram praeparare,
Iesu mortem frequentare
Nos fac, mater gratiae.

Ad Completorium.

1. Vale, caeli symphonia,
Salvandorum melodia,

Stans pro pace foederis,
Vale, aula praemunita,
Stola alba redimita,

Dos aeterni muneris.

2. Vale, sponsa Dei dicta,
Sole Olympi amicta,

Septa sanctis angelis,
O alumna pietatis,
Arca immortalitatis,

Solaris decora,

3. Nos perfrui perennibus
Caelorum regni tinnulis,
Da, fulgens aurora.