190. De sancto Joseph.

1. Gaude, Joseph, fili David,
Deus quod dignificavit
Te regali prosapia,
Orta qua fuit Maria.

2. Gaude, tibi non negatum,
Quod Johanni est collatum,
Intra matris suae ventrem
Sanctam esse suam mentem.

3. Gaude, virginali flore,
Quo nitebas ac decore
Omnium virtutum clare,
Fac, mi Joseph, te amare.

4, Gaude, Deus quod probavit
Dignum te et demonstravit,
Cui Mariam copularet,
Virginem qui et servaret.

5. Gaude, quod te reputasti
Ut indignum, recusasti
Cum regina angelorum
Copulae subire thorum.

6. Gaude, tibi quod illuxit
Angelus, qui et induxit
Te accipere conjugem,
Mariam semper virginem.

7. Gaude, cui famulatum
Et in Bethlehem ducatum
Praestitisti mente pia,
Ubi peperit Maria.

8. Gaude, cultu quod latriae
Primitus regem gloriae
Adorasti, solotenus
Pro nobis missum coelitus.

9. Gaude, Deum quod laudantes
Gloria audis cantantes
Angelorum exercitus,
Quod nobis natus est Christus.

10. Gaude, totis quod medullis
Amas Jesulum, quem ulnis
Tuis quam saepius stringis
Dans oscula et maxillis.

11. Gaude, quod tu pater Christi
Dignus dici meruisti,
Eo quod eras nutritor
Matris ejus atque tutor.

12. Gaude, annis quod ter denis
Virtutibus cum his plenis
Vixeras hic, cum patribus
Dormis illis praesentibus.

13. De hac vita feliciter
Coronandus sublimiter
Pergis, Joseph, Deo care,
Sis dux meus hoc per mare.