132. Litania Omnium Sanctorum.

1. Clemens pater, verbi sator,
Christe, saecli reformator,
Paraclite consolator,
Deus, clemens miserator,

R . Da ut omnis plebs sanctorum
Te imploret atque horum
Audi voces, rex coelorum.

2. O decore rex coelestis,
Da solamen vitae maestis,
Ut post hujus finem pestis
Intersimus tuis festis.

3. O Maria, florens rosa.
Virgo Jesse fructuosa,
Nobis prece gloriosa
Regna pande liliosa.

4. O phalanges angelorum,
O custodes viatorum,
Inter odas beatorum
Nos transferte gaudiorum.

5. O praecones summi regis,
Servatores scriptae legis,
Patriarchae cum prophetis,
Nobis pie suffragetis.

6. O praecusor claritatis,
O baptista veritatis,
Te poscentem pro peccatis
Ora fontem pietatis.

7. Sancte Petre, pastor bone,
Summo gregi nos appone,
Paule doctor, orbis lumen,
Coeli nobis placa numen.

8. O coelorum senatores
Atque orbis decursores,
In extremis adjutores
Sentiamus, non tortores.

9. O cruore purpurati,
Christo duce laureati,
Vestra prece decorati
Collaetemur coronati.

10. O beati confessores,

Mundanorum contemptores,
Paradisi per vos flores
Consequamur et honores.

11. O decorae et prudentes,
Castitate redolentes,
Opem ferte, repellentes
Impudicae vitae sentes.

12. Omnes sancti, vos rogamus,
Ut oretis, supplicamus,
Ne confusi pereamus
Sed vobiscum gaudeamus.

13. O sanctorum rex benigne,
Sempiterna laude digne,
Vitiorum nos ab igne
Munda, sacro replens igne.

14. Pater, Verbum, sanctum flamen,
Electorum tu juvamen,
Nobis pium da solamen
Et aeternum regnum. Amen.