55. De Compassione BMV.

1. Adsis huic speculo,

Mater o Maria,
Pendet in patibulo

Jam Dei sophia,
Dux et decus virginum,

Dulcis, mitis, pia,
De torrentis calice

Qui bibit in via.

2. Quid flens adstas longius?

Propius accede,
Ecce tuus filius

Heu tractatus foede,
Heu plenis opprobris

Donatur mercede,
Hac pius ab impiis

Mactatur a caede.

3. An est, mater, filius
Tuus ad hoc natus,
Ut sic digne genitus,
Sic sit cruentatus?

Vere non immerito

Dicetur beatus
In hoc ejus scandalo

Non scandalisatus.
4. Ad pudoris cumulum

Vestibus nudatur,
Vento, gelu, pluviae

Nudus explicatur
Sistunt longe proximi,

Nullus consolatur,
Sed stant prope nimium,

Per quos cruciatur.

5. Omni poena gravior

Est haec poenae poena,
Quae non tantum mortis est

Sed pudore plena,
Mater vere rumpitur

Tibi cordis vena,
Cum pallescit filii

Facies amoena.

6. In cruore penitus

Venae vacuantur,
Marcet frons et facies,

Rugae procreantur,
Clausis prope ciliis

Oculi versantur,
Sudor mortis exsilit,

Fauces congelantur.

7. Adspice, si praevales,

Mater, hunc dolorem,
Rubor vultus qualiter

Transit in pallorem,
Manus, pedes qualiter

Emittunt cruorem,
Quae materni pectoris

Cumulant moerorem.

8. Rigent tensa stipite

Brachia procera,
Decor vultus pristinus

Liquescit ut cera,
Corpus clavis asperis

Pendet in statera,
Ut sic vaticinia

Vatum fiant vera.

9. Jam nec decor ullus est

Nec decus in ore,
Aures nihil audiunt

Solito de more,
Rubet latus nitidum,

Candet in pallore
Pectus, ruunt genua

Ponderis vigore.

10. Jam dextrorsum nitidum

Caput reclinatur,
Cui se plicans nimium

Collum famulatur,
Horret coma capitis,

Arte non aptatur,
Immo venti flatibus

Huc illuc vagatur.

11, O dolor, nec mortuo
Vel sic pepercerunt,
O moeror, sic lancea
Latus transfixerunt,

O scelus, ut hic et haec
Hoc scelus senserunt,

Sol et luna pariter
Tenebris cesserunt.

12. Plange, mater, filium,

Nunc tempus plangendi,
Ingens est materia

Causaque dolendi ;
"Heu, mi fili," tempus est

Crebro repetendi
Et decentes digitos

Vel manus torquendi.

13. Mater, caput agita

Manibus levatis,
Terram sparge capiti

Comis laceratis,
Rumpe vestem pectoris,

Pectus pietatis
Cum sugenti pandere

Consuevisti gratis.

14. Auras replens quaestibus,

Mater, gemens plora,
Imbres crebri fletuum

Defluant per ora,
Terrae fige genua,

Corruens adora,
Et foedetur pulvere

Facies decora.

15. O quis digne numeret

Omnes hos labores,
Quos pro nobis passus est

Jesus et languores,
Vere nostros pertulit

Hic dolens dolores,
Reddit ipse debitum

Et non debitores.

16. Nicodemus et Joseph

Ecce convenerunt,
Myrrhae atque aloes

Mixturam tulerunt,
Post de plagis quatuor

Claves extraxerunt
Et de crucis stipite

Hunc deposuerunt.

17. Curre nunc, molestissima,

Brachia sustenta,
Quae sunt mortis frigore

Rigide distenta,
His infigas oscula

Centum vel ducenta,
Nec credo, quod fueris

Ducentis contenta.

1S. Jam nil parcens vocibus

Planctus da mugitum,
Lacrimas, suspiria

Profer et rugitum,
Nam scelus huic simile

Nunquam est auditum,
Sed nec erit uspiam

Tale repetitum.

19. Manans de vulneribus

Cruor colligatur,
In signum memoriae

Peplo leniatur
Cateracta capitis

Nunc, mater, rumpatur,
Et de cordis intimis

Gemitus edatur.

20. O quam matris miserae

Cor jam syncopizat,
Dolor indicibilis

Intus colaphizat,
Jam Maria Martha fit,

Jam non sabbatizat,
Quam moeroris fluvius

Perfecte baptizat.

21. Sic post tot angustias

Ut sit tumulatus
Jesus, mundam syndonem

Joseph est mercatus,
In qua Jesus positus

Est sepulchro datus,
Sicque cum custodibus

Lapis est signatus.

22. Jesu, rex misericors,

Tu qui sic obisti,
Per cruorem vulnerum,

Quem de te fudisti,
Mitte nobis spiritum,

Quem tuis misisti,
Ne relinquas orphanos

Quos sic redemisti.