56. Planctus BMV.

1. Eja, virgo gloriosa,
Quondam Noemi formosa,
Pulchra tota, amorosa,
Sed nunc Mara dolorosa.

2. Cur sic cruci adstas fixa,
Crucifixo sic innixa,
Ut dolore sis transfixa,
Tamquam ipsum sis enixa?

3. Quondam illa speciosa,
Cunctis visu gratiosa,
Nunc moerore nubilosa,
Gemens, tristis, lacrimosa.

4. Unde cruciatus sibi,
Quare tantus dolor tibi ?
Forsan causa latet ibi
Major, posset quam describi.

5 Quis vos ambos sic confixit,
Quis dolore sic afflixit?
Nullus homo unquam vixit,
Quem sic tantus dolor frixit.

6. Quae doloris hujus causa
Te tristare fuit ausa,
Latet adhuc in te clausa,
A dolore, quaeso, pausa.

7. Estne ille tibi pater,

Numquid sponsus est aut frater,
Aut num sibi tu es mater,
Quod te torquet dolor ater?

8. Pone modum nunc dolori,
Appropinquas nam languori,
Et est nobis jam timori,
Ne et te contingat mori.

9. Cur te matre sic orbamur?
Refer causam, quam miramur
Et audire praestolamur,
Tibi quod compatiamur.

10. Hujus causam non mireris,
Sed ut mecum contristeris
Et dolore socieris,
Tibi pandamhoc, quodquaeris.

11. Hic a Deo praeelectus

Et prae cunctis tam dilectus
In salutem huc directus,
Carne mea vere tectus.

12. Deus exstat, verbum Dei,
Splendor patris faciei
Et creator omnis rei,
Tota virtus verae spei.

13. Hunc a patre datum cepi
Ac de spiritu concepi,
Sponsa, nata hanc suscepi,
Mater virgo hunc excepi.

14. Ipse decor angelorum,
Gubernator singulorum,
Terrae, maris ac polorum,
Regnans solio eoeloruni.

15. Illic sine matre natus,
Sine patre incarnatus
Est in terris conversatus,
In salutem cunctis datus.

16. Per doctrinae veritatem
Ac signorum caritatem
Vitans mundi vanitatem
Et carnalem voluptatem,

17. Ut in regno deitatis
Statum post mortalitatis
Expiatos a peccatis
Collocaret cum beatis.

18. Talis est dilectus meus,
Jesus Christus, homo Deus,
Non cujusque mali reus,
Quem occidit sic Judaeus.

19. O mi nate speciosus,
Super omnes generosus,
Mitis, clemens, gratiosus,
Semper totus dulcorosus,

20. Illibatus, delicatus,
Sanctus et immaculatus,
Sponsus mei coelibatus
Et solamen incolatus.

21. Visus tibi tenebrescunt,
Genae, labia pallescunt,
Fossae manus intumescunt,
Crura nutant et languescunt.

22. Caput spinis coronatum,
Latus patet lanceatum,
Totum corpus vulneratum
Cerno jam exanimatum.

23. Ei, quis mihi nunc aquarum
Dabit fontem lacrimarum,
Tristem luctum et amarum
Super virum tam praeclarum.

24. Hic est ensis Simeonis,
Qui vigore punctionis
Me in terris privat bonis
Omnis consolationis.

25. O si vita nunc privarer,
Mallem, quam sic te orbarer,
Jam nequaquam perturbarer,
Sed per mortem consolarer.

26. Heu me, fili, quid fecisti,
Cur me solam reliquisti,
Cur me mori noluisti
Potius quam tu obisti ?

27. Cessa, virgo, a ploratu,
Cesset vox ab ejulatu
Ne sub tanto cruciatu
Tu priveris vitae statu.

28. Faciei nam amoenae,

Quae rubebant, pallent genae,
Oculorum turgent venae,
Jam languescunt manus plene.

29. Calor cordis jam tepescit,
Vigor omnis jam lentescit,
Omne corpus jam rigescit,
Tota vita jam marcescit.

30. Ego suae passionis
Tuaeque afflictionis
Causa sum contemptis bonis,
Culpa pravae actionis.

31. Mihi ergo restat fiere
Et ex intimis lugere
Gravi planctuque dolere,
A rugitu non silere.

32. Ego merui necari,

Non in cruce hic litari,
Nec tu sancta molestari ;
Et quis posset hoc effari,

33. Cur hic ordo sit mutatus,
Nisi tantum sim amatus,
Quod a morte liberatus
Summa vita sim beatus.

34. Nihil ergo jam dulcescat,
Sed mens mea amarescat,
A dolore non quiescat,
Donec vita evanescat.

35. Semper visus lacrimetur,
Nunquam animus laetetur,
Nisi per vos consoletur,
Ut in vobis oblectetur.

36. Sed sic. jugiter dolore
Moveatur vel amore,
Dilatetur vel fervore
Ac liquescat prae dulcore

37. Intimae compassionis,
Fecundae dilectionis,
Supplicis devotionis,
Purae contemplationis,

38. Ut virtutum actione,
Fidei confessione,
Gratiarum actione
Sic persistam in agone

39. Et in regno supernorum
Consors factus beatorum
In collegio sanctorum
Christum, regem angelorum

40. Crucifixum, hymnodia
Semper canam laude pia
Teque laudem, virgo dia,
Mihi confer, o Maria.