133. Litania Omnium Sanctorum.

1. Deus pater, qui creasti
Mundum et illuminasti,
Suscipe me poenitentem
Et illustra meam mentem.

2. Fili Dei, Jesu Christe,
Ad te venit reus iste,
Qui in coeli sedes arce,
Supplicanti mihi parce.

3. Sancte, spiritus, tuorum
Consolator miserorum,
Respice me peccatorem
Infundens tuum amorem.

4. Deus unitas superna
Trinitasque sempiterna,
Ut intendam tuae laudi,
Meos gemitus exaudi.

5. Dei genitrix, Maria,
Virgo clemens atque pia,
Ora pro me peccatore,
Ornans me virtutum flore.

6. O Maria, Deo cara,

Stella lucens et praeclara,
Confer mihi caritatem
Necnon et humilitatem.

7. Fac me tibi deservire
Et in te vitam finire,
Ut per te justificari
Possim, per te et salvari.

8. Michael, victor draconis
Pietatisque praedonis,
Volentem mihi nocere
Fac omnino non valere.

9. Gabriel, nuntie Christi,
Cujus ortum praedixisti,
Obsecro, mihi dignare
Mortem meam nuntiare.

10. Raphael, medicamentum,
Tu salus atque fomentum,
Medere meo languori,
Ut sim gratus salvatori.

11. Ad tua nunc praesidia
Cordis levo suspiria,
Cujus mihi custodia
Datur superna gratia.

12. Toto mentis conamine
Precor te, sancte angele,
Ut tuo sim juvamine
Securus et solamine.

13. O vos omnes angelorum
Conventus sanctissimorum,
Precor, ut me animetis
Et in bono confortetis.

14. O Johannes, praeco regis,
Primus testis novae legis,
Fac, ut parem viam Christi.
Quam docere voluisti.

15. O celsi patriarcharum
Ordines et prophetarum,
Apud coeli regem Christum
Excusate reum istum.

16. Signifer apostolorum,

Petre, princeps ceterorum,
Dilue mea peccata
Potestate tibi data.

17. Paule, doctor veritatis,
Lux totius pietatis,
In me, si placet, intende
Et auxilium impende.

18. Andrea, crucis amator,
Sanctitatis praedicator,
Ut laborem non in vanum,
Laboranti praesta manum.

19. Johannes, Christi dilecte,
Ipsius matrem inflecte,
Ut audiat meas preces,
Diluens immundas faeces.

20. Sancte Dei Martialis,

Munda me a cunctis malis,
Ut possim placere Christo,
In cujus conspectu sisto.

21. Apostoli Jesu Christi,
Cui vos credo adsisti,
A malo me liberate
Et in bono confortate.

22. Stephane, culmen honoris,
Primus testis salvatoris,
Adjuva me laborantem,
Qui vidisti Jesum stantem.

23. Laurenti, fortis athleta,
Qui coelorum vides laeta,
Me confirma in virtute
Ut non priver hac salute.

24. Vincenti, strenue miles,

Qui de Christo nunquam siles,
Auxilium mihi praesta,
Ne me turbet mors infesta.

25. Sancte martyr o Quirine,
Apta me legi divinae,
A cohorte tu proterva
In aetornum me conserva.

26. Chrysogone, martyr alme,
Laureatus ramis palmae,
Christo, precor, me commenda
Hora mortis in tremenda.

27. Felix martyr o Castori,
Semper adstans creatori,
Praebe mihi sublevamen,
Quando ducar ad examen.

28. Testis Christi, sancte Vite,
Qui complesti legem rite,
Duc me post hunc incolatum
Ad felicitatis statum.

29. O vos omnes gloriosi
Martyres et pretiosi,
Adjuvate me captivum
Et sanate semivivum.

30. Jeronyme gloriose,
Ecclesiae bellicose,
Qui corruscas ut aurora,
Juva me in mortis hora.

31. Mitem me fac et humilem,
Da virtutes, fuga crimen,
Ut sequar, sicut fuisti,
Callem gressus Jesu Christi.

32. Martine, gemma pastorum,
Lucerna catholicorum,
Tibi supplico, dignare,
Pro me Deum exorare.

33. Nicolae, vir fidelis,

Tu praecellens es in caelis
Sicut fulges deitate,
Sic me dita pietate.

34. O beate Benedicte,
Gregis Dei dux invicte,
Perduc me ad viam rectam
Regionemque electam.

35. Omnes sancti confessores,
Legis Dei defensores,
Me juvate vos sequentem
Quasi jam deficientem.

36. O Maria Magdalena,
Pietate Dei plena,
Summo regi me praesenta,
Cui servis tam attenta.

37. Agatha tu et Lucia

Matre sancta cum Maria,
Ferte pro me Deo preces,
Ut peccati tollat faeces.

38. Agnes, virgo gloriosa,
Fulgens atque pretiosa,
Flecte mihi salvatorem,
Pro quo fudisti cruorem.

39. Caecilia Deo grata,
Rosis veris coronata,
Jesum flecte et exora,
Ut sim felix mortis hora.

40. O martyr Anastasia,
Ignes passa pro Messia,
Hunc, beata, roga Deum,
Ut emundet pectus meum.

41. Ave mea advocata,
Dorothea, sis rogata,
Ut defectus et peccata
Per te a me sint ablata.

42. O beata Margareta,

Coeli tenes quae secreta,
Firma me nunc vacillantem
Et firmatum tene stantem.

43. Ave, Barbara praeclara,
Jesu Christo semper cara,
Praebe Mihi auxilium,
Cum ducar ad judicium.

44. Sancta martyr Katharina,
Praefulgens Christi doctrina,
Deprecare sponsum tuum,
Ne condemnet servum suum.

45. Scholastica, sponsa Christi,
Grata semper cui fuisti,
Iter meum para tutum
Per orationis scutum.

46. Omnes virgines sacratae,
Regi magno copulatae,
Offerte me, quaeso, sponso,
Cum venerit in absconso.

47. Domine Jesu, tuorum
Propter merita sanctorum,
Ut sim totus mundus corde,
Munda me ab omni sorde.

48. Da gratiam in praesenti,
Da veniam poenitenti,
Gloriam da in futura
Vita, qua est pax secura.

49. Omnes in te baptizatos,
Per peccatum inquinatos,
Perduc ad confessionem
Conferque remissionem.

50. Requiem aeternam cunctis
Da fidelibus defunctis,
Ne damnentur in fornace
Sed requiescant in pace.