24. De sancta Cruce.

1. Salve, mundi spes praeclara,
Salus in certamine,

Arbor vitae non ignara
Salutari germine,

Scala coeli, crucis ara,
Agni rubens sanguine.

2. Decus bonis, poena malis,
Sanctae crucis gloria,

Mortis victrix, arx vitalis,
Vitiorum scoria

Rubor palmae immortalis
Ejus fert memoria.

3. Crux haec mortem interemit,
Vitae portas aperit,

Captum hominem redemit,
Vires hostis conterit,

Cohors infernalis gemit,
Cum crux Christum exerit.

4. Ipsum autem crucis lignum
Vetus scribit litera,

Quod amplecti duxit dignum
Deus regens aethera,

Hostem conterens malignum
Mundi tulit scelera.

5. Adam ligno morti datur,
Ipsum crux vivificat,

Hanc Isaac, dum immolatur,
Ligna portans indicat,

Noe justus, ne mergatur,
Arcam ligno fabricat.

6. Tbau pro signo stat erectum
Cum serpente pendulo,

Aqua lignum per injectum
Dulcis fit in poculo,

Sitis abstulit defectum
Petra tacta baculo.

7. Moysesque rubrum mare
Ligno fecit pervium,

Ligno fecit ferrum nare
Helisaei studium,

Virga legis salutare
Crucis fit praesagium.

8. Sanctae crucis his figuris

Eminet religio,
Quas excerpsit de scripturis

Fidei opinio,
Quibus lucet corde puris

Crucis figuratio.

9. Erat impiis horroris

Olim crux supplicium,

Nunc vexillum est honoris
Et salutis praemium,

Tuta quies et dulcoris
Intimi praesidium.

10. Hoc altare dedicatur
Agni Dei victima,

Dum in ipso trucidatur
Per tormenta maxima,

Foris caro perforatur,
Intus dolet anima.

11. Adsunt spongia, fel, sputa,
Cum aceto spinea
Ac flagella, sors, vox muta,

Alba cum purpurea,
Canna, facies polluta,
Funes, clavi, lancea.

12. Haec sunt arma caritatis
Vitae propugnacula,

Quibus Deus nostra gratis
Diluit piacula,

His cor nostrum cogitatis
Cuncta fert abscondita.

13. His vexillum salutare

Tinctum characteribus

Fert tutamen singulare
Spiritu pauperibus,

Qui sub ejus militare
Cupiunt lateribus.

14. O crux, vitae medicina,
Spes salutis unica,

Parum pondera reclina
Ad aegrotos coelica,

Peccatorum de sentina
Levans nos salvifica.

15. Sola digna tu fuisti

Ferre mundi pretium,

Consecrans membris Christi,
Coeli sanctuarium,

Mortem nobis abstulisti
Reddens vitae gaudium,

16. Christe Jesu, fili Dei,
Regum rex altissime,

Condemnate more rei,
Pendens poenalissime,

Precor, miserere mei
Tergens labes animae.

17. Intus mentem, corpus foris
Crucis cum signaculo

Muni, Deus, cunctis horis,
Ne peccati vinculo

Stringat me fraus temptatoris
Palam vel in clanculo.

18. Tuo tecum genitori

Et amborum flamini

Laudes angelorum chori
Dent et orbis termini,

Magnus aeque cum minori
Tuo canant nomini.