29. De Sepulchro Christi.

1. O sepulchrum Jesu Christi,
Tu thesaurum conclusisti,
Petra, petram quae vestisti,

Coeli, terrae Dominum.
Spes perennis vitae jacet,
Mundo spreto Deo placet,
Nube tonat, morte tacet

Mortem mordens hominum.

2. In te clausus orbem regit,
Mortuus regna subegit
Et inferna claustra fregit
Christus rex victoriae.

Verbum Dei carni junctum
In te contines ad punctum,
Christum suscipit defunctum,

Largitorem gloriae.
3. Ex contactu consecraris
Christi carnis, tu rigaris
Sacro sanguine, bearis

Tantis privilegiis.
Vere tumba tu praeclara,
Sacer locus, felix ara,
Mira pandis, facis rara,

Hymnis digna regiis.

4. Mortuum quem suscepisti,
Christum vivum reddidisti
Sanctum neque corrumpisti

Vermis, tabis vitio ;
Tu es cruci comparata,
Caro poenis immolata
Cruce, tecum tumulata

Pio fit officio.
5. Ex te surgit immortalis
Jesus, victor triumphalis,
Patri consubstantialis,

Par omnipotentia;

Qui dum surgit, manes clausum,
Ut pravorum fraenet ausum,
Morte qui fecerunt plausum

Summa cum clementia.
6. O sepulchrum venerandum,
Propter Christum adorandum,
Te aperias ad dandum

Jesum plenum gratia;
Ut cum fuero sepultus,
Morte Christi sim suffultus,
Me splendore tui vultus,

Pie Jesu, satia.