100. Ad B. Mariam V.

1. Christi mater generosa,
Sponsa regis speciosa,
Quae es virgo gloriosa
Et de partu gaudiosa.

2. Angelorum imperatrix,
Super coelos dominatrix,
Quae es vitae reparatrix
Et a morte liberatrix.

O. Tu relucens margarita
In corona regis sita,
Pietate es polita,
Caritate insignita.

4. Sanctitatis disciplina,
Facta mundi medicina,
Servos levans a ruina
Fraude lapsos serpentina.

5. Probitate singularis,
Vita mundi, stella maris,
Delicata puellaris,
Aqua viva salutaris.

6. Fons signatus illibatas,
Hortus clausus et vallatus,
Fructu sacro cumulatus.
Et pigmentis fecundatus.

7. Tu es salus infirmorum,
Auxilium peccatorum,
Fons signatus, fons hortorum,
Terge sordes delictorum.

8. Ego miser et peccator,
Legis sanctae violator,
Veritatis depravator,
Falsitatis praedicator.

9. Vitam meam inquinavi,
Feci malum et tractavi,
Crimen omne adamavi,
Me in illis reclinavi.

10. Factus sum ut sus lutosa,
Quae perquirit paludosa,
Vita turpis, maculosa,
Loca quaerit tenebrosa.

11. Vitam spernens electorum
In sepulchro peccatorum,
In cloaca vitiorum
Collocavi mihi thorum.

12. Tali ego vivens vita,
Quaerens semper illicita
Sum effectus Moabita,
Pejor omni sodomita.

13. Sed tu, domina regina,
Mitis, simplex, columbina,
Pia, dulcis et benigna,
Summi regis mater digna.

14. Fac per guttam pietatis,
Flamma cedat pravitatis,
Ut de vena sanctitatis
Fons erumpat castitatis.

15. Per amoris tui rorem

Aufer a me hunc ardorem,
Ne habeam damnatorem,
Quem habui redemptorem.

16. Regem illum, tuum natum,
Fac et mihi tu placatum
Et in sede potestatum
Praesta mihi praesulatum.