72. De Gaudiis BMV.

1. Gaude, per quam angelorum
Gaudet chorus et sanctorum

Perenni laetitia,
Quos praecellis, gratiosa,
Super omnes gloriosa

Speciali gloria.

2. Gaude, gemma, templum Dei,
Per quam datur lux diei

Solis de praesentias
Per te magis illustratur,
Illustrata jucundatur

Tota coeli curia.

3. Gaude, lampas saeculorum,
Cui parent supernorum

Omnes coeli curiae,
Vultum tuum deprecantes,
Tamquam matrem venerantes

Sui regis gloriae.

4. Gaude, cella fluens melle,
Cujus voto Christi velle

Sociavit caritas,
Quidquid tuae pietati,
Placet summae trinitati,
O pura virginitas.

5. Gaude, virgo, quae decoras
Servos tuos et honoras

Hic et in coelestibus,
Nos cum ipsis ad amoena
Paradisi laude plena

Transfer tuis precibus.

6. Gaude, rosa, princeps florum
Super thronos angelorum

Gloriosis laudibus
Exaltata jucundaris,
Trinitati sociaris

Et sanctorum milibus.

7. Gaude, cujus non marcescit
Laus et honor, nec decrescit

Gaudiorum gaudium ;
Jam secura gloriaris,
Juncta Christo coronaris

Super regni solium.

8. Omni laude mater digna,
Te laudanti sis benigna

In hac vita misera ;
Imperatrix gloriosa,
Consolatrix viscerosa,

Nos a peccatis libera.

9. Quando dies erit irae,
Fac tormenta non sentire

Tua colentes gaudia,
Fac ut tecum nos laetemur
Et securi jucundemur
In coelesti patria.