168. De sancta Caecilia.

1. Ave, virgo gloriosa,
Toti mundo gaudiosa,
Beata tu Caecilia,
Rubens sicut florens rosa,
Tota dulcis et formosa,
Vincens candore lilia.
2. Digna nata es Romana,
Docta lege Christiana
Ab ipsis jam cunabulis,

Corde Christi verba sana
Gerens ut salutis grana

Despectis mundi fabulis.
3. Tuque saepe jejunasti,
Veste dura castigasti

Tuum corpus femineum,
Deum semper exorasti,
Cunctis sanctis commendasti

Tuum decus virgineum.

4. Matri Christi plus aequata,
Sponsis suis es praelata

Cunctis in hoc articulo,
Nam es viro desponsata,
Manens tamen virgo grata

In lecto, in cubiculo.
5. Qui attendit diligenter,
Admiratur vehementer

Tam magnam in te gratiam,
Quod tam caute, tam prudenter
Superasti innocenter

Saevi sponsi audaciam.
6. Duos sponsos habuisti,
Quorum mater et fuisti

Terrenum atque coelicum;
Unum fide concepisti,
Hunc in altero genuisti

Per dogma evangelicum.

7. O argumentosa apis,

Quae sunt Dei, bene sapis,

In mel mutans fel mentium ;
Multos ab inferno rapis,
Quos ad fidem Christi capis

Es mater et egentium.
8. O salvatrix animarum,
Portis victrix et poenarum,

Novo gaude signaculo,
Tam pulchrarum coronarum,
Paradiso allatarum

Angelico miraculo.
9. O electa instituto,
Sis fidelis praelocutrix

Contra hostem nequissimum,
Sis in morte mea tutrix,
Tu mei fortis sis adjutrix,

Ad sponsum duc carissimum.