DUBIUM.

1. Sed contra objicitur, quod nullus homo sua anima est : ergo inconvenienter videtur nominare Beatum Joannem animam suam.

2. Praeterea, Videtur quod Paulum debuerit plus diligere : quia a Paulo fuit conversus et fide instructus, et ita ab eo plus recepit : ergo plus eum diligere debuit secundum sententiam Domini, Matth. vii, 12.

3. Si dicatur, quod plus eum dilexerit secundum conformitatem ad. Dei amorem ; quia Beatus Joannes fuit a Christo prae aliis magis dilectus. Contra est, quod Christus dilexit plus Petrum, quia commisit ei custodiam sui gregis, et ita Petrum plus diligere debuit.

Sed ad primum dicendum, quod est ibi synecdochica locutio,secundum quod ponitur pars pro toto. Vel aliter potest dici, quod sicut dicit Philosophus in X Ethicorum, " homo est solum intelle-" ctus : " quia id quod est hominis in quantum homo, est solum secundum intellectum : et ideo quia solum vivit secundum intellectuales operationes humanae vitae. Et propter hoc sanctus vir potest dici anima : quia tota vita sua est secundum animam.

Ad secundum dicendum, quod secundum ordinem humanae affectionis Dionysius plus diligebat a quo plura bona acceperat : sed secundum conformitatem ad Dei dilectionem diligebat plus Joannem.

Et ideo dicendum ad tertium, quod Christus quodammodo, sicut dicit Augustinus, dilexit plus Petrum, et alio modo dilexit plus Joannem. Dicitur enim secundum divinam dilectionem eum plus diligere secundum majorem dilectionis affectum, cui scilicet plus de suis bonis communicat : et ita plus dilexit Joannem, quia plus cum diligit, quem plus amatorem sui constituit : Petrus autem plus dilexit Christum in membris, et ideo etiam eum praefecit gregi suo : Joannes autem plus dilexit eum quantum ad quietem in ipso : et ideo praetulit eum privilegio amoris revelationis : quare non commisit sibi Ecclesiam regendam, quia contemplativi solent esse negligentes de custodia aliorum : et sic etiam Dionysius per conformitatem ad Christum quodam modo plus dilexit Petrum, et quodam modo plus Joannem.