DUBIUM.

1. Sed videtur hoc esse falsum : quia veros Philosophos non oportet sursum agi nisi ad ea ad quae sufficiunt principia philosophiae, sed ad veritatem divinorum non sufficiunt principia philosophiae, quia divina sunt supra principia rationis ex quibus philosophia procedit : ergo Philosophos non oportet sursum agi in Deum.

2. Ad idem, Ad causam quae non tota manifestatur in effectu, non potest deveniri per suum effectum : sed Deus cum sit in infinitum excedens creaturam, non manifestatur totus in aliquo effectu ; ergo ex affectibus ejus, de quibus est philosophia, non potest sursum agi in ipsum.

3. Ad idem, Ubi est processus de effectu ad causam, ibi est e converso processus de causa ad effectum : sed per causam primam non potest concludi aliquis effectus : ergo nec ex effectibus potest deveniri in ipsam.

4 ." Praeterea, Omnis relatio effectus stat in causa proportionata : sed talis causa non est Deus : ergo ex effectibus non potest deveniri in ipsam.

Sed dicendum, quod sursum agi in aliquid, stat dupliciter : vel simpliciter, sicut in id quod demonstratione concluditur, et sic Philosophi non possunt sursum agi in divina : vel per admirationem, dum probatur aliquid in cujus comprehensionem ratio non potest, et sic oportebat eos sursum agi in divina:

quamvis enim philosophia nihil probet contra divinam veritatem, quam tradit fides, cum non pertingat ad ipsam, habet tamen aliquem terminum in quem deveniat, et scit se non comprehendere totum : et ideo debet admirari, non impugnare, sicut per philosophiam probatur, quod in Deo sunt perfectiones omnium generum, et quod in eo est summa simplicitas, et quod ipse est sua actio, et multa hujusmodi quae non videntur inter se posse compati secundum principia rationis ex quibus procedit in aliis rebus : et ideo dicit Philosophus, quod causa prima est supra narrationem et rationem. Et per hoc patet solutio.