BALTH. CORDERII, S. J. INTERPRETATIO.

Dicitur autem sapientia sibi domum aedificare, in qua cibos solidos, et pocula, crateremque proponit, ut omnibus divina rite conferentibus perspicuum sit, eum, cujus est providentia, perfectum esse causam, ut sint et bene sint omnia, eumque ad universa pertingere, et in omnibus exsistere, atque omnia continere, rursusque eumdem, cum sit in se excellenter, nihil in ulla re, ulla ex parte esse, sed secretum esse ab omnibus, cum in se ipso eodem aeternoque modo sit, perstetque et maneat, atque semper idem sit, eodemque modo se habeat, nec ullo modo se ipse deserat, neque sedem suam immobilemque mansionem, et quasi larem relinquat, sed in ea omnia perfectaque providentiae suae munera perficiat, et procedat ad omnia, et in se maneat ; et insistat semper ac moveatur ; et neque insistat neque moveatur ; sed ac si quis dicat, ut qui actiones suae providentiae in perseverantia, et perseverantiam in providentia connaturaliter simul ac supra naturam habeat.

16