DIVISIO ET EXPOSITIO TEXTUS.

Deinde solvit et ponit solutionem quae modo dicta est: dividitur autem in duas partes. In prima solvit, in secunda confirmat solutionem per experimentum, ibi, Et si aliquis videns Deum, etc.

Dicit ergo primo : 0 Caii, tu accipiens haec excessive, sed non secundum privationem, id est, si accipis tenebras quae causantur ex excessu et non ex defectu luminis, enuntia, id est, dicere potes sine impedimento positae objectionis, quod lumen divinum supervere existens, id est, omnem veritatem superans, latet habentes, et ignorantia secundum Deum, id est, Dei quae causatur in nobis ex abundantia sui luminis, latet habentes cognitionem existentium proportionatam eis, et tenebrae ipsius, scilicet Dei, superpositae, id est, ex eminentia ipsius in nostro intellectu relictae, et cooperiuntur omni lumini, id est, nullum lumen sufficit ad palpandas eas, et ideo absconduntur omni cognitioni.