ARTICULUS I.

Quid sint Potestates ?

Ad primum proceditur sic :

Dicit Gregorius, quod " Potestates vocantur hi Angeli qui haec potentius caeteris in suo ordine perceperunt, ut eorum ditioni virtutes adversae subjectae sint, quorum potestate refraenantur, ne corda hominum tantum tentare praevaleant, quantum volunt . "

Sed hoc videtur nihil esse.

1. Si enim Angelus non cecidisset et homo non peccasset, nihilominus essent novem ordines Angelorum : et tunc Potestates non haberent officium arcendi daemones, neque virtutes adversas : ergo videtur, quod hoc aut non sit officium eorum, aut sit officium per accidens.

2. Item, Quaeritur de hoc quod dicit, Qui hoc potentius in suo ordine perceperunt. Ex hoc enim videtur, quod tantum quidam in illo ordine dicantur Potestates, et non omnes.

3. Item, Dicit Apostolus, ad Roman. xiii, 2, quod qui resistit potestati, Dei ordinationi resistit. l,t dicit ibidem , quod gladium portat ad vindictam malorum, et ad laudem honorum. Ex hoc videtur, quod de ratione potestatis sint quatuor, scilicet potentia quae est ut substantia ipsius, et ordinatio quae est ut forma, et vindicta mali, et tutamen bonorum, quae duo sunt ut fines. Ergo videtur, quod insufficienter determinet beatus Gregorius, quando determinat per arcere contrariam potestatem.

4. Item, Cum duo sint fines potestatis, unus est tantum principalis, scilicet tutamen bonorum : ergo si voluit determinare a fine, potius determinare debuit a fine ultimo, quam ab illo qui est citra ultimum.

5. Item, Beatus Bernardus in sermone 19 super Cantica dicit: " Illi spiritus qui Potestates nominantur, dum Crucifixi nostri divinam omnipotentiam ubique fortiter attingentem intueri ac magnificare delectantur, exturbare ac debellare daemonum hominumque contrarias potestates, pro his qui haereditatem capiunt salutis, accipiunt potestatem. " Ex hoc etiam videtur, quod conversio istorum Angelorum non sit super Angelos, sed super daemones, et malos homines : et ita videntur esse de inferiori hierarchia. Hoc idem accipitur ex hoc quod infra dicit : " A potestatibus diligitur Deus ob illam justissimae potentiae vim, quae solet a piis malignantium populsare et arcere crudelitatem. "

6. Item, Idem ad Eugenium in libro V de Consideratione dicit : " Potestates putemus, quarum virtute potestas tenebrarum comprimitur, et coercetur malignitas aeris hujus, ne quantum vult noceat, et ne malignari nisi ut prosit, possit. "

7. Item, Gregorius : " Sunt nonnulli qui etiam de obsessis corporibus malignos spiritus fugant, eosque virtute orationis et vi acceptae potestatis ejiciunt. Quo itaque isti meritum suum nisi inter Potestatum coelestium numerum sortiuntur ? " Ex hoc videtur, quod Potestatum sit operari supra corpora hominum : et cum hoc minus sit quam operari super animam, videntur Potestates inferiores esse Archangelis et Angelis.

Solutio. Dicimus, quod de intentione Potestatis quatuor sunt, quae in objectione commemorata sunt. Beatus autem Gregorius determinat non per ea quae exiguntur, sed per actum non primum, sed consequentem. Potestatum enim est arcere potentiam stantem et ordinantem ad tutamen boni et coercitionem mali contra Deum se erigentis. Et licet non esset malum, aut peccatum, nihilominus tamen Potestates essent: et ideo distinctionem officiorum Angelorum quae erant ad guberna?ionem mundi, conveniebat fieri non secundum id tantum quod fuit in prima creatione, sed secundum omnem statum futurum in mundo gubernando.

Et per hoc patet solutio ad primum.

Ad secundum dicendum, quod ordo non accipitur ibi pro speciali ordine, sed pro generali ordinatione omnium ordinum in suis hierarchiis.

Ad aliud patet solutio per praedicta.

Ad aliud dicendum, quod licet tutamen bonorum sit finis principalis, tamen super illos non est actus potestatis : quia boni non sentiunt gladium potestatis, sed mali.: et ideo cum beatus Gregorius determinet per actum, ponit finem non ultimum, sed illum qui est materia supra quam est actus.

Ad aliud dicendum, quod propria conversio hierarchiae mediae est super superiorem. Sed quia quidquid potest inferior, potest et superior, convertuntur etiam illi de media hierarchia quidam ex consequenti super homines, et non ex proprio actu. Et hoc supra patuit in auctoritatibus induciis ex Daniele, et Ezechiele, et Zacharia, ad quos missi sunt Angeli loquentes illuminationes suas a d illos, qui ulterius ponebant eas in Prophetis : et hoc manifestabitur inferius cum de missione disputabitur.

Per hoc patet etiam ad sequens.

Ad ultimum dicendum, quod proprius actus Potestatum est expellere contrariam potestatem, sed quod propellatur a corpore, hoc accidit: et ideo per hoc non habet determinari.