ARTICULUS 1. An materia sit ?

Ad primum proceditur sic :

1. Forma dat esse: ergo quod caret omni forma, caret omni esse : sed materia prima secundum rationem primae materiae accepta, caret omni forma : ergo caret omni esse : et quidquid caret omni esse, nihil est : ergo materia prima nihil est secundum rationem materiae primae accepta, quia caret omni forma : ergo caret omni esse.

2. Item, Dicit Philosophus in libro de Causis, quod prima rerum creatarum est esse, et non est ante ipsum creatum aliud. Ergo quod est ante esse, non est de numero creatorum : sed quidquid est ante formam, est ante esse : ergo quod est ante formam, non est de numero creatorum : materia autem prima est ante formam : ergo non est de numero creatorum : et quidquid non est de numero creatorum, nihil est : ergo materia prima nihil est. Quod autem hoc sit ante esse quod est ante formam, patet ex hoc quod esse non est nisi individui, vel speciei, vel generis, vel principii : et omne tale est a forma : ergo omne tale est a. forma individui, vel speciei, vel principii.

Item, Probatio quod forma est illa quae contrahitur per differentias, et non materia, quemadmodum principium contrahitur generalissimorum, et quod genus contrahitur per differentias specierum, et species per differentias individuorum, sicut dicit Porphyrius , quod individuum facit collectionem accidentium quae in alio esse non possunt inveniri.

3. Item, Dicitur quod generatio substantiae est ex non substantia : sed a quocumque removetur superius, et inferius : ergo si est ex non substantia, est ex non materia : et nihil aliud est significatum materiae in materia nisi id ex quo est generatio : ergo videtur, quod materia nihil sit in natura.

4. Praeterea, Dicitur in libro Deuteromonii, XXXII, 3 et 4 : Date magnificentiam Deo nostro. Dei perfecta sunt opera. Sed materia non est perfecta. Ergo non est de operibus Dei : et quod non est de operibus Dei, nihil est : ergo materia nihil est.

Contra :

1. Glossa super Genesim in principio dicit, quod per caelum et terram intelligitur materia inferiorum et superiorum creaturarum.

2. Item, Augustinus in libro XII Confessionum : " Tu, Domine, fecisti mundum de materia informi, quam fecisti de nulla re pene nullam rem : " ergo materia est.

3. Item, Generatio et corruptio non sunt sine actione et passione : actio autem et passio non sunt sine contrarietate, sicut dicit Philosophus in primo Physicorum , quod contraria separata non agunt, sed in materia : ergo materia est.

1. Item, Contrariorum semper est unum subjectum : et illud est materia : ergo materia est.

5. Item, ibidem dicit, quod principia mutationis tria sunt, scilicet subjectum quod est materia, et duo contraria : ergo materia est,

Solutio. Quod concedimus dicentes ad primum, quod forma dat esse : ma-

teria autem habet esse subjecti et potentiae : et hoc habet a seipsa, et hoc non est esse simpliciter, sed secundum quid.

Ad aliud dicendum, quod cum dicitur, Prima rerum creatarum est esse, ponitur esse pro ente, sicut dicit ibi Commentator in expositione illius propositionis. Et idem dicit beatus Dionysius in libro de Divinis nominibus . Et dicitur ibi primum natura, a quo non convertitur consequentia subsistendi, et sic ens est absolute primum : quia in ipso stat resolutio posteriorum in prius. Et ibidem hoc primum ponit principium cognitionis. Cum autem dicitur materia prima, ponitur principium secundum rationem generationis et temporis. Et sic patet, quod primum hinc inde ponitur aequivoce : quia cum dicitur de ente, est principium cognitionis respectu eorum quae ordinabilia sunt in praedicamento. Cum autem dicitur de materia, est principium generationis respectu generatorum.

Ad aliud dicendum, quod cum dicitur, Generatio substantiae est ex non substantia, negatio negat substantiam compositam, relinquendo potentiam ad illam quae est materia. Si dicitur, quod remoto superiori removetur inferius. Dicendum est, quod hoc verum est quando negatur superius significatione et suppositione : sed cum dicitur non substantia, non fit suppositio pro superiori, sed pro particulari generabili. Et est ratio, quia generatio non est superioris, sed inferioris particularis : natura enim non intendit generare hominem, sed hunc.

Ad ultimum dicendum, quod omnia opera Dei perfecta sunt : sed perfectio omnium operam non est unius rationis, imo unumquodque dicitur perfectum, quando est in debito statu sui esse : et ideo materia perfecta est, quando habet rationem subjecti ad formas generabilium.