308. Vado mori.

Vado mori, mori, naturae cedo, recedo,

Ut pereunt, abeunt cetera, vado mori.
Vado mori tortus, ortus sub littore portus,

Qui vix, si vixi; discite, vado mori,
Vado mori, pueri teneri sub sorte, teneri

Me morbis orbis sentio, vado mori.
Vado mori crescens, adulescens corpore grato,

Fato compellor cedere, vado mori.
Vado mori iuvenis et plenis sanguine venis,

Areo nunc, pereo, marceo, vado mori.
Vado mori miro me stante viro rutilante,

Tempore nunc Christi corpore vado mori.
Vado mori vetulus querulus fractasque subactus,

Deficio vario vulnere, vado mori.
Vado mori, metas mortis non effugit aetas,

Cernens, discernens haec ego, vado mori.
Vado mori modicus, mendicus, egens, male degens;

Quid mihi sic misere vivere? vado mori.
Vado mori plenus opibus, quibus, heu, male partis

Usus et effusus exsulo, vado mori.
Vado mori victus parci, mordentis amictus,

Ne crucier, satier amodo, vado mori.
Vado mori crapula, quae sedula fercla retorquet,

Torquet adeps misera viscera, vado mori.
Vado mori castus nullaque libidine pastus,

Ut videam, teneam caelica, vado mori.
Vado mori Veneris celeris teda cum lue foeda,

Ut poenae plenae sint mihi, vado mori.
Vado mori vilis, humilis non corde tumente,

Ut mihi sit varia gloria, vado mori.
Vado mori tumidus et acerbus, mente superbus,

Ad limos imos transeo, vado mori.
Vado mori late circumfusus pietate,

Dia mihi reserans ostia, vado mori.
Vado mori pavidus, miser, invidus, omnibus hostis,

Postis avernus avet me sibi, vado mori.
Vado mori comitis, ducis auctus honore, Quiritis,

Praedia praeliaque transfero, vado mori.

Vado mori regis clarus diademate, legis

Custos et iustos transeo, vado mori.
Vado mori; bacule, quid et annule, mitra, peristis?

Tristis adest hora, nec mora, vado mori.
Vado mori papa vel satrapa nomen et omen,

Hoc leve sive breve desero, vado mori.