27. De Vita Iesu Christi.

1. Iesu Christe, sempiterni

patris unigenite,
Patri consubstantialis,

coaequalis gloriae,
Tu de summis ibi manens

advenisti sedibus
Unam aggregare vagam

nonagenis ovibus.

2. Tu divino sine viro

conceptus spiramine,
Nuntiante Gabriele

natus es de virgine,
Ac si cedrus alta vallis

conformetur hysopo,
Sine quantitate magnus

unitus homunculo.

3. Sic procedens quasi gigas

geminae substantiae
Ad currendam exsultasti

viam mundi libere,
Universa nutu regens

et disponens proprio,
Locum non inveniebas

natus diversorio.

4. Vagiebas intra saepta

praesaepis absconditus,
Cui cives supernorum

adplaudebant caelitus;
Vita vivens, in te manens,

verbo pascens omnia,
Lactis opem esuristi

suspensus ad ubera.

5. Qui decorem es indutus

et amictus lumine,
Involutus iacuisti

pannorum sub tegmine,
Angelorum excitati

pastores praeconio,
Transierunt admirati

Deum in praesaepio.

6. Sic magi stellam videntes

orientis partibus
Venerati sunt lactentem

mysticis muneribus ;
Innocens es circumcisus,

ut sub lege fieres,
Quatenus nos, qui sub lege

fuimus, redimeres.

7. Cum duobus columbarum

pullis aut turturibus
Templo datus es acceptus

Simeonis manibus;
Puniendus ab Herode

petisti suffugium,
Ut dilata cummularet

mors mundo suffragium.

8. Generali subrelinquens

stragi coaetaneos,
Innocentes praemisisti

cruoris vicarios ;
Ex Aegypto revocatus

post Herodis obitum
Nutriendus elegisti

Nazareth latibulum.

9. Semper idem ipse, cuius

anni non deficiunt,
Aeviternas admisisti

vices, quae praetereunt;
Baptizatus cum fuisses

in Iordanis flumine,
Spiritus super te mansit

in columbae specie.

10. Et elapsa de suspernis

vox patris intonuit:
Iste est filius meus,

in quo mihi complacuit ;
Post dierum quadraginta

temptatus ieiunium
Angelorum accepisti

triumphans obsequium,

11. Iuxta mare Gallilaeae

bis binos aspiciens
Piscantes vocasti fratres,

te sequi praecipiens;
Virtus patris, quae creasti

et gubernas omnia,
Homo factus nova quidem

fecisti miracula.

12. Signorum architriclino

tu ditasti nuptias,
Sex ex aqua vino facto

plenas reddens hydrias;
Item quino pane binos,

pisce quinque milia
Satiasti in secreta

reparans impendia.

13. Caecisvisum, claudis gressum,

mutis eloquentiam,
Auditum dedisti surdis,

leprosis munditiam ;
Ex obsessis effugasti

daemones corporibus,
Paralysi destitutos

innovasti viribus.

14. Diuturna exstinscisti

sanguinis profluvia,
Rediviva contulisti

defunctis vitalia;
Quieverunt tempestates

ad vocis imperium,
Mare calcabilitatis

praebuit obsequium.

15. Reparationis nostrae

futura commercia
Ostensursus Thabor montis

adisti fastigia.
Transfigurans temet ipsum

habuisti splendidam
Faciem ad instar solis,

vestem ut nix candidam.

16. Inque suas prociderunt

facies apostoli,
Petrus, Iacobus, Iohannes,

pavore perterriti-
At qui verus Deus vera

fecisti magnalia,
Caro factus vera carnis

tulisti dispendia.

17. Panis vivus esuristi,

vitae fons ad puteum
Sedens a Samaritana

poposcisti poculum ;
Qui sedes super Cherubim

trinam regens machinam,
Ierosolymam intrasti

sedens super asinam.

18. Captus a Iudaeis, ut te

regem constituerent,
Declinasti, sponte te dans,

ut te crucifigerent ;
Lacrimantis, extergentis,

ungentis obsequia
Peccatricis acceptasti,

cuncta laxans debita.

19. Corpus tuum in sumendum

dedisti cum sanguine
Fratribus in spem salutis

et ritum memoriae
Et post cenam caput illud

tremendum virtutibus
Lavandis discipulorum

inclinasti pedibus.

20. Factus erat sudor tuus

sicut guttae sanguinis,
Dum transferri postulares

ad te gustum calicis;
Sed hoc opus ordo nostrae

salutis poposcerat,
Ut inde vita rediret,

unde mors obvenerat.

21. Cum prolixius orares

in agone positus,
Angelus consolabatur

paventem humanitus;
Tertio iam ab orandi

reversus instantia,
Dormitantes invenisti

fratres prae tristitia.

22. Te quaerentem non fugisti

Iudaeorum populum,
Non negasti proditoris

Iudae pacis osculum;
Captus non renitebaris,

sed ut agnus innocens
Protrahentes es secutus

probra multa sustinens.

23. Zelum Petri frangens, Malchi

contingens auriculam,
Munerasti pietatis

medela malitiam ;
Flagellatus et consputus

a servis pontificum
Ductus es usque ad summi

sacerdotis atrium.

24. Circumventus cum fuisses

a viris mendacibus,
Innocentem te clamavit

praeses coram omnibus:
Inde plebis et cohortis

arte delusoria
Spoliatus et nudatus

chlamyde coccinea

25. Processisti, manu tenens

virgam arendineam
Coronamque plexam gerens

de spinis impositis;
Morti tandem condemnatus

ad crucis patibulum
Accessisti nullum quaerens

fugae patrocinium.

26. Pro redemptione nostra

patri voluntariam
[Ut] pontifex obtulisti

tuae carnis hostiam,
Cum iniquis deputatus

clavis fossis pedibus
Pependisti perforatis

per transversum manibus.

27. Ad verum assumptae carnis,

lamentans indicium
Exclamasti voce magna

traditurus spiritum ;
Tua sibi vestimenta

divisit plebs impia,
De contexta, cuius foret,

sortientes tunica.

28. Universa congemiscens

creatura stupuit,
Velum templi rumpebatur

et terra contremuit ;
Obscurato sole mundum

contexerunt tenebrae,
Petrae scindi cernebantur,

mortui resurgere.

29. Lancea demum inflicto

laterali vulnere
Mox exivit salutaris

unda mixta sanguine;
Ioseph ab Arimathia,

nobilis decurio,
Corpus tuum, sibi datum

a Pontio Pilato,

30. Ungens illud et involvens,

sicut moris fuerat,
Posuit in monumento

novo, quod exciderat.
Domum fortis invasisli

trudens illum vinculo
Et direptis vasis eius

redisti de barathro,

31. Inventam reportans ovem,

pastor bonus, umeris.
Post diem resurrexisti

tertiam a mortuis ;
Apparitionis tuae

dedisti primitias
Mulieri, de qua septem

daemones eieceras.

32. Congregatis propter metum

in unum discipulis
Pacis pignus attulisti,

clausis intrans ianuis;
Quibusdam de visione

primum dubitantibus,
Carnem illis obiecisti

palpandam cum ossibus.

33. Item Thomae, non credenti

discipulis aliis,
Monstrasti clavorum loca,

cicatricem lateris ;
Diebus post passionem

quadraginta testibus
Apparens praeordinatis

argumentis pluribus

34. Exspectandum imperasti

convescens paraclitum,
Quem promissum per os tuum

noscant sancti spiritum.
Hinc in caelum elevatis

manibus et oculis
Benedictionem tuam

dedisti discipulis,

35. Et ascendens supra caelum

illis intuentibus
Triumphalem praesentasti

carnem patris vultibus,
Rursum venturus cum servis

rationem ponere,
Singulis secundum lucra

talentorum reddere.

36. O rex regum, ne sis huius

immemor commercii,
Sed in tanti nos confirma

virtute mysterii,
Da nobis exemplo tui

terrena despicere,
Blasphemantes non timere

nec laudes appetere.

37. Veritate radicati

floreamus gratia,
Corde, verbo, actu tua

sequentes vestigia,
Venumdato sub peccatis

condolentes saeculo
Succurramus prece, voto,

lacrimis, ieiunio.

38. Carnem nostram tuae crucis

confige stigmatibus
Ad supplendum hic, quae tuis

desunt passionibus ;
Talem tecum crucifixis

da perseverantiam,
Ut nos ipsos vespertinam

demus tibi victimam.

39. Da nobis pro tua morte

nostra tibi solvere,
Ut commonentes simul

possimus convivere,
Occurrentes in mensuram

tuae plenitudinis,
Decreti divinitatis

et beatitudinis.

40. Consortes nos suscitabis

et in patris dextera
Iugi tuae nos visionis

satiabis gloria ;
Tuo semper hic, ubique

perfungamur exitu,
Qui cum patre regnas Deus

et cum sancto spiritu.