147. De Beata Maria V.

1. Mente gaudens praedicabo
Dei matrem et laudabo,
Tibi carmen decantabo.

2. Cordis mei nosce votum,
Malum a me pelle totum
Et amoris auge votum.

3. Mater, audi et exaudi,
Miserere miseri,
Menunc cerne necbuncsperne
Cantum tui servuli.

4. Ave, mater desponsata,
Dei mater praenotata,
Virgo semper illibata.

5. Ave, lumen Simeonis,
Vellus madens Gedeonis,
Sponsa prudens Salomonis.

6. Ave, solis florens hortus,
Stella maris, tutus portus
Et optatus semper potus.

7. Ave, moris disciplina,
Tu caelorum es regina
Et dolorum medicina.

8. Ave, virgo puellarum,
Lux sanctorum et sanctarum,
Per te crescunt nec marcescunt
Flores pudicitiae.

9. Ave, rosa speciosa,

Gemma splendens pretiosa,
Virga Iesse fructuosa.

10. Deum caeli peperisti,
Mundo lapso succurristi,
Nexum mortis denexisti.

11. (O) virgo Dei sanctissima,
Tu pax mundi tutissima
Et vitis fecundissima.

12. O mater virtutum,
Servis tuis scutum
Semper praebe tutum.

13. Ut hostis mali sortes
Ipsi vincant fortes
Nec malorum sint consortes.

14. O Maria, mater pia,
Mundi salus, vitae via,
A te, quidquid gessi,
Virgo, non recessi,
Te in corde gessi.

15. Opem a te quaero,
Mater, nec despero.
Sed iuvamen quaero.

16. Solve meorum
Vincla peccatorum,
Lumen angelorum.

17. O fons indeficiens,
Dulcis et reficiens,
Ad te curro sitiens.

18. Imple desiderium
Cordis et suspirium,
Dulce refrigerium.

19. Tu in me robur insere,
Ut hostem possim vincere
Et tecum semper vivere.

20. O quam beata,
Per quam reserata
Sunt Adae vitia!
O quam laudanda
Mater et amanda

Per quam tanta munia:

21. O quam serena
Virgo, fide plena,
Cuius mira iustitia
Nostra fuit laetitia.

22. Haec despexit haec terrena,
Caelis regnat haec suprema,
Ubi nulla tristitia.

23. Haec est vita mortuorum,
Dulce carmen angelorum,
Interventrix scelerum,
Per quam Christus, rex caelorum,
Vincla solvit peccatorum,
Preces audit contritorum.

24. Haec est illa, quae nescivit
Thorum viri, dum . . . .
Porta patens caelica,

25. Haec est virgo, quae portavit

Deum verum, quem amavit,

Quem laudat plebs angelica.

26. Haec in caelis veneratur
Et in terris adoratur
A plebe catholica.

27. Mater dulcis, nos dignare
Tua laude confirmare
Et virtute roborare.

28. Ne in mundo hoc cadamus,
Te iuvante evadamus,
Lapsi per te resurgamus.

29. Virgo, dulcis parens,
Tactu viri carens.
Modo miro peperisti,
Deum caeli genuisti,
A quo facta tu fuisti,
Post quem virgo permansisti.

30. Tu a Christo es electa
Et ab ipso es protecta,
Cuius mater es dilecta.

31. O res mira, virtus diva
Illibata permansisti,
Natum caelis praemisisti,
Ad cuius dextram resedisti,
Quando mundum reliquisti.

32. Ibi semper veneraris,
Virgo parens, et laudaris,
Quae cum Christo gloriaris.

33. O quam pium est laudare
Dei matrem et amare,
Toto corde suspirare,

34. Quae laudantem protegit
Nec plorantem despicit,
Sed quasi mater respicit.

35. Gaude, mater pietatis,
Gaude, norma caritatis,
Gaude, forma sanctitatis.

36. Gaude, virgo castitatis,
Gaude, templum trinitatis,
In manus tuae pietatis
Me commendo, lux claritatis,
Ut me mundes a peccatis.

37. O virgo

Dei piissima.
Ad me pia

converte viscera.

38. O quae via es filiis,
Tuis succurre servulis,
Cunctis fer opem miseris.

39. Mater dulcis, non me fraudo,
Quando Iesum teque laudo,
Preces audi, carmen claudo.