178. Cursus de Omnibus Sanctis.
Feria tertia.

Ad Matutinum.

1. Rex, civium caelestium
In quo laetatur contio,
Psallens sanctorum omnium
Iam summo cum tripudio.

2. In quorum laudem munera,
Quae tibi nunc offerimus,
Sint nobis salutifera
Tibique grata, petimus.

3. Regi sanctorum omnium
In cunctis dominatio,
Sit honor, laus, imperium
Et gratiarum actio.

Ad Laudes.

1. Te Deum canit iugiter
Omnis chorus angelicus,
Patriarcharum pariter
Et cuneus propheticus.

2. Te turba apostolica
Hymnis, chorea virginum
In cithara harmonica
Psallendo laudat Dominum.

3. Sic martyrum organica
Te tympana suaviter
Et confessorum cantica
Mulcent in corde dulciter.

4. In cymbalis sonantibus
Tota caelestis curia
Et melicis concentibus
Coniubilat in gloria.

5. Regi sanctorum omnium.
Ad Primam.

1. Per sanctos tuos, Domine,
Quos iam caelesti lumine
Irradiatos novimus,
Suppliciter deposcimus,

2. Nos legem tuam pariter
Fac meditari iugiter,
Ut semper fructum operum
Reddamus salutiferum.

3. Deo patri per omnia
Sit virtus et victoria,
Qui nos cum sanctis omnibus
Coronet in caelcestibus.

Ad Tertiam.

1. Te ob sanctorum merita,
Deus, precamur inclita,
Qui in caelorum culmine
Tecum quiescunt. Domine.

2. Nos corde, ore, opere
Fac innocenter vivere,
Ut caeli tabernacula
Intremus sine macula.

3. Deo nostro per omnia.

Ad Sextam.

1. Per pretiosam omnium
Sanctorum mortem praemium
Caelorum, Deus, citius
Confer nobis propitius.

2. Reatus rumpe vincula
Et submove pericula,
Ut vota nostra dulciter
Tibi reddamus iugiter.

3. Deo nostro per omnia.

Ad Nonam

1. Beati sunt, qui habitant
Caelos; ut hos, qui militant
In terris, iuvent precibus,
Praesta, Deus, supplicibus.

2. Nunc reple nos virtutibus,
Confer cum sanctis omnibus
Nobis post dona gratiae
Aeterna bona gloriae.

3. Deo nostro per omnia.

Ad Vesperas.

1. Promissa, Deus, praemia
Nobis in fine temporum
Cum sanctis da sublimia,
Perennes dotes corporum,

2. Hinc clara et subtilia
Glorificata corpora,
Cita, impassibilia
Et tui plena pectora.

3. Da animabus pariter
Aperte te cognoscere
Ac frui te suaviter
Perfecteque diligere.

4. Fac nos cum sanctis omnibus
In te gaudere Domino,
Dum omnia in omnibus
Es regnans sine termino.

5. Regi sanctorum omnium.

Ad Completorium.

1. O lux, sanctorum speculum,
Da nobis post hoc saeculum
Te sublevatis manibus
Laudare in caelestibus.

2. Te quoque benedicere,
Tuas virtutes canere,
Da, Deus exercituum,
Laudemus in perpetuum.

3. Deo nostro per omnia.