74. Ad singula membra B. Mariae V.

1. Benedicta, omnibus
Per quam mulieribus

Datur benedictio,
Laudent te per omnia
Omnium praeconia

Laudum privilegio.

2. Benedicta maxime
Virginalis animae

Singularis puritas,
Cuius in palatio
Parat Dei filio

Mansionem trinitas.

3. Benedicta castitas
Carnis, ex qua deitas
Nascitur in homine,
Quem tu, virgo, generas
Et, quod primo noveras,
Non perit in virgine.

4. Benedicta, gaudium
Comprehendens omnium,

Fidelis auricula,
Quod credendo concipis,
Dum caelestis suscipis

Nuntii oraculum.

5. Benedicta viscera,
Contra iuris foedera

Sancto feta spiritu,
Dei patris filium
Quae per trium mensium

Baiulant circuitu.

6. Benedicta pariens
Ventris nec aperiens

Virginale ostium,
Sicut sol non aperit
Vitrum, quando exserit

Ab introrsum radium.

7. Benedicta genua,
Quibus vitae ianua

Vagiens excipitur,
Et quae pondus sustinent,
Quod caeli non continent,

Quod mundo non capitur.

8. Benedicti oculi,

Quibus regem saeculi,

Mater pura, respicis,
Eius contemplatio
Omni plena gaudio

Vultibus angelicis.

9. Benedictae genulae,
Quae ad illam sedule

Se astringunt faciem,
Cuius visu omnium
Obtutus caelestium
Nullam capit satiem.

10. Benedicta labia
Super favum dulcia

Dei sapientiae,
Quorum gaudet osculis
Promissus a saeculis

Dilectus ecclesiae.

11. Benedictum caelitus
Collum, quod humanitus
Amplexantur brachia
Partes mundi superas
Pariter et inferas
In se continentia.

12. Benedicta ubera,
Lacte quorum tenera

Eius aetas alitur,
Qui digne sumentibus
Cibus est credentibus

Nec sumptus consumitur.

13. Benedictus gremii
Locus Dei filii

Digna facta sessio,
Qui simul caelestibus
Praesidet spiritibus
Et fovetur gremio.

14. Benedictum lectuli
Vice caput parvuli

Refovens pectusculum,
Cum vel somnus capitur,
Vel dum mamma sumitur

Sacri lactis poculum.

15. Benedicta brachia,
Quibus portans omnia

Portitari voluit ;
Simeon hoc gaudio
Semel fretus taedio

Usum vitae habuit.

16. Benedicta manuum
Dignitas, qui actuum

Diversorum baiula
Coaptant panniculos,
Qui credentes populos

Purgant culpae macula.

17. Benedicta capitis
Species, in abditis

Semper gaudens occuli,
Non videri gestiens,
Sed videre fugiens

Omnem pompam saeculi.

18. Benedictus gressuum
Motus, se ad arduum

Semper iter dirigens
Atque in custodia
Lapsus omnis nescia

Viam suam corrigens.

19. Benedictus vestium
Decor virginalium

Minime superfluus
Atque alimoniae
Tenor, sanctimoniae

Virginali congruus.

20. Benedicta omnibus
Benedictionibus,

Virgo plena gratia,
Tua benedictio
Nostra sit protectio

Virtus et victoria.