54. Ad Christum Patientem.

1. Salve, Iesu Nazarene,
Caput tuum non serene
Demonstratur coronatum,
Nam videtur sauciatum.

2. Salve, caput spinis punctum,
Salve, cruore perunctum
Ac percussum arundine
Saeva amaritudine.

3. Salvete, o foramina,
Inflicta spinis et spina,
Salve, o magnum pretium
Sanguinis spinis obvium.

4. Salvete, carnes purpuratae,
Ex flagellis maculatae,
Manus et spinae fecerunt
Hirsutas et pupugerunt.

5. Salve, o frons generosa,
Spinis ac fletu rugosa,
Es obscurata nimium
Propter salutem omnium.

6. Salvete, clari oculi,
Flevistis more parvuli,
O Isaac, senuisti,
Visum morte perdidisti.

7. Salve, decora facies,
Non erat tibi species,
Cum terris stetisti maesta,
Caelo fulgens auges festa.

8. Salvete, nares et genae,
Multis incommodis plenae,
Vos, nares, foetor turbavit,
Vos, genae, dolor vexavit.

9. Salvete, o aures piae,
Vos pravorum blasphemiae
Intus et in cute satis
Nimis pupugerunt gratis.

10. Salve, mentum, salve, barba,
Te signavit illa barba,
In quam descendit unguentum
Ut sanguis in tuum mentum.

11. Salvete, dentes lactei,
De felle facti fellei,
Ad uvam acerbam nimis
Obstupuistis inprimis.

12. Salve, lingua verbi Dei,
Es punita causa mei
Per sitim et escam fellis,
Quae nihil habebat mellis.

18. Salve, guttur ex labore,
Ex siti ac ex clamore
Laborasti raucitate
Simulque ariditate.

14. Salve, collum caesum dure
Alapis gentis impurae,
In te apparuit pendens
Sanguis capite descendens.

15. Salve, dorsum tritum flagris
Uti frumentum de agris,
De te grana ceciderunt,
Quae salubria fuerunt.

16. Salvete, sacri umeri,
Exstitit vobis oneri
Contra iuris argumentum
Portare mortis tormentum.

17. Salvete, tensa brachia,
Traxistis ad vos omnia,
Quae erant in caelo sursum
Et quae in terra deorsum.

18. Salvete, manus tenerae,
Iunctae fuistis misere,
Dum libenter exsolvistis
Ea, quae non rapuistis.

19. Salve, dextra Iesu Christi,
Grave vulnus habuisti,
Salve, vulnus, effudisti
Pretium, quod tenuisti.

20. Salve, o manus sinistra,
Tu vitae nostrae ministra,
Tuus est cruor roseus,
Quem effudit homo Deus.

21. Salve, pectus contristatum
Propter hominis reatum,
Tu plorasti cum gemitu,
Quod peccavit pro libitu.

22. Salve, o venter carnee,
Caro carnis virgineae,
Tuam Cham nuditatem
Derisit ob pravitatem.

23. Salvete, femora detecta,
Ensis et arma sunt abiecta
In corporis passione
Pro nostra dilectione.

24. Salvete, sancta genua,
Prodiistis ad ardua
Et petistis humilia,
Curvata ad vestigia.

25. Salvete, crura Domini,
Salus ut esset homini,
Cucurristis in spinosa,
In aspera et caenosa.

26. Salvete, pedes gloriosi,
In esurie et in siti
Quaesistis ovem perditam,
Inter lupos absconditam.

27. Salve, vulnus dextri pedis,

Salve, o spes firmae aedis,

Salve, clavis, salve, sanguis,

Salve, o aenee anguis.

28. Salve, sancte pes sinister,
Salve, o bone magister,
Salve, foramen vulneris,
Tu laus humani generis.

29. Salve, latus salvatoris,

Salve, vulnus redemptoris,

Salve, sanguis veri floris,

Salve, aqua mundatoris.

A

30. Salve, o cor, aruisti

Ut foenum. quando subisti
Mortem volens, quam sitisti,
Dum in cruce perstitisti.

31. Salve, o dulcis anima
Iesu Christi peroptima,
Tu sensisti, quod tunica
Tua tulit Davitica.

32. Salvete nunc, o omnia
Membra Christi felicia;
Tota nostra familia
Stat victrix in victoria.