66. De Sancta Cruce.

1. Maximum solacium

animi languentis,
Suspirantis, avidi,

Christum sitientis
Sitis in gemitibus

multis et lamentis,
Est in cruce Domini

mundum redimentis.

2. Crux est, in qua pascua

sunt deliciarum,
Virtus et amoenitas,

cibus animarum,
Innumerabilium

dona gratiarum,
Quae per cuncta redolent

climata terrarum.

3. Splendor indeficiens,

claritas divina,
Regula iustitiae,

vitae disciplina
Et nostrorum vulnerum

dulcis medicina,
Per quam omnes liberi

simus a ruina.

4. Crux est odorifera,

plena gaudiorum,
Scala perfectissima,

portus electorum,
Hic fons est caelestium

desideriorum,
Fervor et incendium

cordium iustorum.

5. Est in cruce Domini

gloria decoris,
Copia dulcedinis,

initium saporis,
Poculum inebrians,

stimulus amoris
Et evacuatio

planctus et maeroris.

6. Mentium iucunditas,

requies secura.
Pax interminabilis,

pulchritudo pura,
Per crucem acquiritur

gloria secura.
Crucis amatoribus

nunquam peritura.

7. In cruce cibaria

sunt mansuetorum,
Tota spes fidelium,

clara lux caecorum
Et claudorum baculus,

census egenorum,
Firmitas debilium,

salus infirmorum.

8. Crux est pavor daemonum

et morsus inferni,
Per quam fluxit radius

luminis aeterni,
Regis invictissimi

gratia superni,
Utinam hoc videant

homines moderni.

9. Crucis beneficium

debet plus amari,
Recoli frequentius

et desiderari,
Nec deberent homines

unquam satiari
Crucifixo Domino

recte famulari.

10. Crucis beneficio

sumus liberati,
Qui eramus perditi

atque maculati,
Modo sumus roseo

sanguine mundati,
Patri clementissimo

reconciliati.

11. Doleo, quod homines

plures hoc ignorant,
Qui nec crucem diligunt

nec crucem honorant
Nec in cruce Domini

student nec laborant,
Ideo post obitum

in inferno plorant.

12. Crucis desiderio

corda sint ignita,
In qua nostra iacuit

et pependit vita,
Iesus, amor omnium,

salus infinita,
Per quem sunt et saecula

cuncta stabilita.

13. Christianus quilibet

sit in cruce totus,
Cum sit ibi sanguine

pretioso lotus,
Cruci semper cupiat

vivere devotus,
In caelesti curia

si vult esse notus.

14. Omnis homo studeat

crucem revereri
Crucifixi nobilis;

amatoris veri,
Si vult in caelestibus

maximus haberi
Et beatam faciem

eius intueri.

15. Vulnera remedium

sunt nostri languoris,
Haec pretiosissimi

vasa sunt liquoris,
Terminus exsilii,

requies laboris,
Ibi sapor hominis

est interioris.

16. Felix, qui vulneribus

istis vulneratur.
Pretioso sanguine

Domini potatur,
Pascitur, afficitur

et inebriatur,
Gaudet mirabiliter

atque iucundatur.

17. O suave vasculum,

redolens unguentum,
Sanguis, qui languentium

es medicamentum,
Da virtutum omnium

nobis incrementum,
Cordium solacium

et delectamentum.

18. O pretiosissime

sanguis salutaris,
Sanguis, qui virtutibus

cunctis dominaris,
Nos a cunctis hostibus

semper tuearis,
Angelorum coetibus

iunge nos praeclaris.

19. O crux admirabilis,

dulcis et amoena,
Celebris hominibus,

caritate plena,
Per te nostri criminis

fracta est catena,
Ut salvemur penitus

ab aeterna poena.