237. De sancto Iohanne Evangelista.

1. En, Iohannes, humi pronus
Te adoro volens bonus

Esse tui servulus,
O quam felix in supernis
Regnas, ubi Iesum cernis,
Qui est tui iubilus.

2. Et Mariam contemplando,
Ipsam pie collaudando

Sentis dulce gaudium,
Toto corde iucundaris,
Dum unius contemplaris

Trinique mysterium.

3. In suprema hierarchia
Locum tenens melodia

Dulci Deo iubilas,
Virgo martyr et propheta,
Doctor fulgens ut planeta

Caelo valde rutilas.

4. Tu columna militantis

Et perpulchrum triumphantis

Decus es ecclesiae,
Multum timent te, Iohannes,
Nec audire possunt Manes

Laudes tuae gloriae.

5. Sanctus omnis et beatus
Te collaudet et firmatus

Angelus in gratia,
Ego servus tui data
Tibi terris mente lata
Texo privilegia.

6. Gaude, nate Zebedaei,
Quia virgo Mater Dei

Est tua matertera ;
Gaude, quia meruisti
Consobrinus esse Christi

In hac vita misera.

7. Gaude, preces ad Mariae
Iesus ornat tuas pie

Vino sancto nuptias ;
Gaude, sponsam reliquisti
Et sic semper tenuisti
Virginum munditias.

8. Gaude, Iesus te elegit
Et ab aevo praeelegit

Suum in apostolum.
Gaude, Iesus te amavit
Et prae cunctis demonstravit

Se tibi benevolum.

9. Gaude, Iesum speciosum
Conspexisti gloriosum

Tabor in cacumine ;
Gaude, parans Iesu cenam
Monte Sion, omni plenam

Caelica dulcedine.

10. Gaude, Iesus proditorem
Tibi pandit gerens morem

Tui desiderio;
Gaude, tibi Iesu pectus
Fit in cena mollis lectus
Dulcisque pausatio.

11. Gaude, Iesus, quando sedes,
Lavat pronus tibi pedes

Angelis mirantibus;
Gaude Iesus, postquam sedit,
Se in cibum tibi dedit

Sacris suis manibus.

12. Gaude, Iesu care frater,
Cuius parens tua mater

Suo fit imperio ;
Gaude, nam post mortem Christi
Suae matris habuisti

Curam pio studio.

13. Gaude, viros Iesum flentes
Ac de cruce deponentes

Adiuvasti propere;
Gaude, fuit tumulatum
A te corpus Iesu, datum

Morti nostro scelere.

14. Gaude, gaude cessans fiere,
Nam surrexit Iesus vere,
Dulce manna superis;
Gaude, manus, pedes, latus
Redemptoris osculatus,
Cum redit ab inferis.

15. Gaude, Iesus de te vere
Dixit: eum sic manere

Volo, donec veniam.
Gaude, saepe Dei natus
Fecit tibi suscitatus

De se ipso copiam.

16. Gaude. Iesus scandit caelos
Te cernente, cui melos

Caeli cives faciunt ;
Gaude, ignis dona dando
Venit in te, dies quando

Pentecostes finiunt.

17. Gaude, fili Zebedaei,
Sepelisti matrem Dei,

Portam ad caelestia;
Gaude, cernis, quod Maria
Caelos intrat harmonia

Angelorum praevia.

18. Gaude, sospes exivisti,
Zelo Iesu quod inisti,

De ferventi dolio;
Gaude, scribis altas omnes,
Quas vidisti, visiones

Manens in exsilio.

19. Gaude, quia, quam amasti,
Drusianam excitasti

Ephesum ingrediens;
Gaude, lustrans caeli pratum
Scribis: verbum caro factum

Est in mundum veniens.

20. Gaude, sine laesione
Potas virus in agone

Propter Iesum inito ;
Gaude, tecti cum fuerunt
Tua veste, surrexunt

Mortui persubito.

21. Gaude, multos retraxisti
A peccatis, quibus Christi

Valde gaudet curias
Gaude, quia sine poena
Transivisti ad amoena

Paradisi gaudia.
Gaude, cernens iam vestitum
Tuum corpus et amictum

Stolae suae gloria.

22. Te, Iohannes, ego peto,
Sume munus vultu leto,

Quod tibi nunc offero;
Per te Iesus castitatem
Mihi det et caritatem,

Quam valde desidero.

23. In me fides viva crescat
Cunctis horis, qua decrescat

Satanae nequitia;
Culpis meis non desperem,
Sed in Iesu morte sperem
Suique clementia.

24. Non sit murmur meo corde
Nec inquinet os cum sorde

Culpae detractoriae;
Fac me templum frequentare
Zelo Iesu nec me dare
Crimini desidiae.

25. In adversis patientem

Et in poenis me gaudentem

Crucis fac memoria,
Mortem Iesu fac me fiere,
Suae matrisque dolere
Nimia tristitia.

26. O Iohannes, mi patrone,
Meae mortis in agone

Mihi sis praesidio.
Post cum Iesu fac videre
Me Mariam et gaudere

Tecum caeli solio.