77. Salutatio Angeli ad Mariam.

1. Ave, plena gratia,

Virgo, vas honoris,
Audi verba nuntia

Iucundi rumoris,
Pro tua munditia

Me venisse noris
In mundum superis

assumptus missus ab oris;
Qui caelum terramque simul

formavit et aequor,
Ad te me misit;

iussa paterna sequor.

2. Ista salutatio,

Novo facta more,
Quae, unde sit nescio,

Me replet stupore,
Pectus meum sentio

Moveri timore,
Non ego sperabam

sic adeunda fore.
Ista salubria tu

quo defers verba paratu,
Obstnpeo mentis

deficiente statu.

3. O speciosissima,

Depone timorem
Vanaque non aestima.

Quam denuntio, rem.
Tu es coniunctissima

Deo per amorem,
Te Deus elegit,

vas nobile, vas in honorem ;
Convenit, ut terris

caelestia numina places,
Cunctis praeferris

sola Deoque places.

4. Miror totis sensibus

Te tanta virtute
Loqui de caelestibus

Mihi constitutae
In mundi laboribus

Atque servitute ;
Non ego digna fui

tali tantaque salute.
Unam de minimis

me video, vertor in imis;
Vox tua sublimis

facta iocosa nimis.

5. Maria, sis istius

promissi secura,
Erit tibi filius

stupente natura,
Prius et posterius

virgo permansura,
Concipies puerum

miro partu paritura;
Naturae tu ius

violans gravis efficieris,
Illius, es cuius

filia, mater eris.

6. Quali modo, nescio,

Venter prolem fundat,
Quem carnalis actio

Viri non fecundat,
Sine exercitio

Terra non fructum dat,
Semen ubi non est,

fructus non inde redundat,
Deficit effectus

sibi causa deficiente,
Illeque defectus

fit rerum lege manente.

7. O Maria, dubium

Cor habere desine,
Concipies filium

Sine viri semine,
Tale puerperium

Dabit suo numine,
Cui tres personae,

tria nomina sunt sine fine;
Qui, quia te reperit

fragrantem plus cinnamomo,
In tua se clausit

viscera factus homo.

8. In his, quae tu asseris,

Toto corde gaudeo,
Venisse a superis

Nunc te vere video,
Scio, quidquid dixeris

De partu virgineo,
Credo nam facile

omnia posse Deo.
Si dubitasse vides

me, veniam mihi des;
Tarda solet magnis

rebus inesse fides.

9. Olim qui aridulam
Virgam fecundavit,
Elisabeth vetulam

Qui nunc impraegnavit,
Te pudoris cellulam
Sibi praeparavit,
Virgo decora nimis, David de semine regis.
Vas, virgo, veniae, missum tibi suscipe Deum,
Solem iustitiae, regem paritura supremum.